గుజరాత్ రాష్ట్రం అహ్మదాబాద్ నగరంలోని రద్దీగా ఉండే రోడ్డుపై, ఒకే బైక్‌పై నలుగురు యువకులు అత్యంత ప్రమాదకరమైన రీతిలో సర్కస్ ఫీట్లు చేస్తూ స్టంట్ చేసిన షాకింగ్ వీడియో ఇంటర్నెట్‌లో విడుదలై తీవ్ర కలకలం రేపింది. దీంతో ఈ స్టంట్‌కు పాల్పడిన వారిపై అహ్మదాబాద్ పోలీసులు కఠిన చర్యలు తీసుకున్నారు.
సోషల్ మీడియాలో రీల్స్ చేసి ఫేమస్ అవ్వాలనే మోజులో, తమ ప్రాణాలతో పాటు ఇతర వాహనదారుల ప్రాణాలను సైతం లెక్కచేయకుండా వీరు చేసిన ఈ అత్యుత్సాహం ప్రజల్లో తీవ్ర విస్మయం కలిగించింది.
సోషల్ మీడియాలో వైరల్‌గా మారిన ఆ వీడియోలో.. వేగంగా వెళ్తున్న ఒక బైక్‌పై ముగ్గురు వ్యక్తులు కూర్చోగా, మధ్యలో ఉన్న వ్యక్తి భుజాలపై నాలుగో యువకుడు ఎక్కి కూర్చుని ఏమాత్రం భయం లేకుండా ప్రయాణించడం కనిపిస్తుంది.
ఏమాత్రం బ్యాలెన్స్ తప్పినా నలుగురి ప్రాణాలు గాలిలో కలిసేంత అత్యంత ప్రమాదకరమైన రీతిలో, ఎలాంటి భద్రతా పరికరాలు లేకుండా వారు ఈ స్టంట్ చేశారు. పబ్లిక్ రోడ్డుపై ఇతర వాహనదారులను భయాందోళనలకు గురిచేసేలా జరిగిన ఈ ఘటనపై నెటిజన్లు తీవ్రంగా స్పందించారు. అహ్మదాబాద్ పోలీసులను ట్యాగ్ చేస్తూ కఠిన చర్యలు తీసుకోవాలని డిమాండ్ చేశారు.
వీడియో వైరల్ కావడంతో వెంటనే రంగంలోకి దిగిన అహ్మదాబాద్ ట్రాఫిక్ పోలీసులు, వాహనం రిజిస్ట్రేషన్ నంబర్ ఆధారంగా అందులో ప్రయాణించిన యువకులను గుర్తించి వెంటనే అరెస్టు చేశారు.
అంతేకాకుండా, స్టంట్ చేయడానికి ఉపయోగించిన బైక్‌ను కూడా సీజ్ చేసిన అధికారులు.. వారిపై ర్యాష్ డ్రైవింగ్, ప్రజలకు ఇబ్బంది కలిగించడం తదితర సెక్షన్ల కింద కేసు నమోదు చేశారు.
లైక్‌లు, వ్యూస్ కోసం కక్కుర్తిపడి ఇలా పబ్లిక్ రోడ్లపై ప్రాణాలను పణంగా పెట్టి స్టంట్లు చేసే వారికి ఈ ఘటన సరైన గుణపాఠం అవుతుందని అధికారులు హెచ్చరించారు.
Leave a Reply