అలీఘర్: ఉత్తరప్రదేశ్‌లోని అలీఘర్‌లో అల్లుడితో కలిసి పారిపోయిన అత్త వార్త ప్రస్తుతం చర్చనీయాంశంగా మారింది. గత ఏడాది సప్నా దేవి అనే మహిళ తన కుమార్తెకు కాబోయే భర్త రాహుల్‌తో కలిసి ఇంటి నుండి పారిపోయి సంచలనం సృష్టించింది. దాదాపు 10 నెలల తర్వాత ఈ జంట మళ్ళీ వార్తల్లోకి వచ్చింది.
తన కంటే 11 ఏళ్లు చిన్నవాడైన అల్లుడు రాహుల్ ఇటీవల పోలీసులను ఆశ్రయించి, తన భార్య (అత్త) ఇప్పుడు తన బావతో కలిసి పారిపోయిందని ఆరోపించాడు. అయితే, ఇప్పుడు సప్నా దేవి స్వయంగా పోలీస్ స్టేషన్‌కు చేరుకుని అసలు నిజాన్ని బయటపెట్టింది. తాను ఎవరితోనూ పారిపోలేదని, రాహులే తనను వేధించాడని వెల్లడించింది.
అసలేం జరిగిందంటే: గత ఏడాది జితేంద్ర కుమార్ అనే వ్యక్తి తన కుమార్తె శివానికి రాహుల్‌తో పెళ్లి నిశ్చయించారు. కానీ, పెళ్లికి ముందే రాహుల్ తన కాబోయే అత్త సప్నా దేవితో ప్రేమలో పడ్డాడు. వీరిద్దరూ కలిసి ఇంట్లో ఉన్న ₹3.5 లక్షల నగదు, నగలతో పారిపోయారు. ఆ తర్వాత తాము పెళ్లి చేసుకున్నామని ప్రకటించి 10 నెలల పాటు అద్దె ఇంట్లో కాపురం చేశారు.
అత్త వెల్లడించిన నిజాలు: రాహుల్ చేసిన ఆరోపణలను సప్నా దేవి పూర్తిగా తిరస్కరించింది. ఆమె పోలీస్ స్టేషన్‌లో ఇలా పేర్కొంది:
- “నేను ఎవరితోనూ పారిపోలేదు. రాహుల్ నన్ను బంధీగా ఉంచాడు.”
- “మొదటి నెల రోజులు బాగానే చూసుకున్నాడు, ఆ తర్వాత నన్ను గదికే పరిమితం చేశాడు. నాకు తెలియకుండా మత్తు మందులు ఇచ్చేవాడు.”
- “నేను తెచ్చిన నగలు, డబ్బు అంతా అతనే ఖర్చు చేసేశాడు. ఇప్పుడు నన్ను అప్రతిష్ట పాలు చేయడానికి నా బావపై అబద్ధపు ఆరోపణలు చేస్తున్నాడు.”