హసీన్ మస్తాన్: కాలం మారితే కేవలం ఆటలు మాత్రమే కాదు, జీవితాలే తలకిందులవుతాయని అంటారు. ఒకప్పుడు ఎవరి పేరైతే వింటే వణికిపోయేవారో, నేడు వారి పిల్లలే న్యాయం కోసం ప్రాధేయపడుతున్నారు. అండర్‌వరల్డ్ డాన్ హాజీ మస్తాన్ కుమార్తె హసీన్ మస్తాన్ మీర్జా, తనపై జరుగుతున్న వేధింపులు మరియు ఆస్తి దొంగతనం విషయంలో న్యాయం చేయాలని పీఎం మోదీ మరియు కేంద్ర హోంమంత్రి అమిత్ షాకు విజ్ఞప్తి చేశారు. ఈ సందర్భంగా ఆమె కొన్ని దిగ్భ్రాంతికరమైన విషయాలను వెల్లడించారు.
అత్యాచారం మరియు వేధింపులు: తన మేనమామ కుమారుడితో 1996లో బలవంతంగా వివాహం జరిగిందని, అతను తనపై అత్యాచారం చేయడమే కాకుండా, తన ఆస్తిని కాజేయడానికి తన గుర్తింపును (Identity) కూడా దొంగిలించాడని ఆమె ఆరోపించారు. తనకు పెళ్లి జరిగినప్పుడు తాను మైనర్ అని, తనకంటే ముందే అతనికి 8 సార్లు వివాహమైందనే విషయం తనకు తెలియదని ఆమె పేర్కొన్నారు.
ఆత్మహత్యాయత్నం: పెళ్లి కోసం తనపై తీవ్ర ఒత్తిడి తెచ్చారని, ఆ బాధ భరించలేక తాను మూడుసార్లు ఆత్మహత్యాయత్నం చేశానని హసీన్ తెలిపారు. “నేను మోదీ మరియు అమిత్ షాకు విన్నవించుకుంటున్నాను. దేశంలో అత్యాచారాలు, హత్యలు నిత్యం జరుగుతున్నాయి. నా విషయంలో బాల్యవివాహం, అత్యాచారం, ఆస్తి కాజేయడం వంటివి జరిగాయి. చట్టాలు కఠినంగా ఉంటేనే నేరగాళ్లకు భయం ఉంటుంది” అని ఆమె అన్నారు.
ముస్లిం మహిళల కోసం మోదీ చేసిన చట్టాలపై ప్రశంస: గత వారం ఇన్‌స్టాగ్రామ్‌లో ఒక వీడియో పోస్ట్ చేసిన హసీన్, సంవత్సరాలుగా తనకు న్యాయం జరగలేదని ఆవేదన వ్యక్తం చేశారు. ముస్లిం మహిళల కోసం మోదీ ప్రభుత్వం తీసుకొచ్చిన ‘త్రిపుల్ తలాక్’ చట్టాన్ని ఆమె ప్రశంసించారు. ఇస్లాం పేరుతో మతపరమైన చట్టాలను కొందరు దుర్వినియోగం చేస్తున్నారని, మోదీ తీసుకొచ్చిన బిల్లు మహిళలకు విముక్తి కలిగించిందని ఆమె అభిప్రాయపడ్డారు.
తండ్రి మరణం రెండేళ్ల తర్వాతే తెలిసింది: తన తండ్రి హాజీ మస్తాన్ మరణించిన విషయం కూడా తనకు రెండేళ్ల తర్వాతే తెలిసిందని ఆమె కన్నీరు పెట్టుకున్నారు. తనను తన కుటుంబానికి దూరం చేశారని, ఆస్తి కోసమే తనను బంధించి అత్యాచారానికి పాల్పడ్డారని ఆరోపించారు. చివరకు తనకు వేరే దారి లేక న్యాయం కోసం బహిరంగంగా బయటకు వచ్చానని ఆమె వెల్లడించారు.