నాగ్‌పూర్: తన కొడుకు పదే పదే దొంగతనాలు చేస్తున్నాడనే కారణంతో కన్న తల్లిదండ్రులే ఆ బాలుడిని గొలుసులతో కట్టేసిన అమానుష ఘటన నాగ్‌పూర్‌లోని ఇమామ్‌వాడ ప్రాంతంలో వెలుగుచూసింది.
ఏం జరిగింది?
నివేదికల ప్రకారం, 12 ఏళ్ల ఈ బాలుడికి చిన్న చిన్న దొంగతనాలు చేసే అలవాటు ఉంది. తల్లిదండ్రులు ఇంట్లో లేని సమయంలో బయటకు వెళ్లి చుట్టుపక్కల ఇళ్లలో లేదా దుకాణాల్లో దొంగతనాలు చేసేవాడు. దీనివల్ల ఆ తల్లిదండ్రులు సమాజంలో అవమానాలు ఎదుర్కోవాల్సి వచ్చింది. కొడుకు ప్రవర్తనను మార్చలేకపోయిన తల్లిదండ్రులు, ప్రతిరోజూ పనికి వెళ్లే ముందు ఆ బాలుడి కాళ్లకు ఇనుప గొలుసులతో తాళం వేసి బంధించేవారు. ఉదయం నుండి సాయంత్రం వారు పని ముగించుకుని వచ్చేవరకు ఆ పిల్లాడు ఇంట్లోనే బందీగా ఉండేవాడు.
వెలుగులోకి వచ్చిందిలా..
బాలుడు గొలుసులతో కిటికీ దగ్గర నిలబడి ఉండటం గమనించిన పొరుగువారు వెంటనే పోలీసులకు మరియు శిశు సంక్షేమ కమిటీకి సమాచారం అందించారు. ఘటనా స్థలానికి చేరుకున్న పోలీసులు బాలుడిని రక్షించి, గొలుసులను కత్తిరించి అతడిని విముక్తుడిని చేశారు.
తల్లిదండ్రుల వాదన:
పోలీసు విచారణలో తల్లిదండ్రులు తమ నిస్సహాయతను వ్యక్తం చేశారు. “మా కొడుక్కి దొంగతనం చేయడం అలవాటైపోయింది. ఎన్నిసార్లు చెప్పినా వినడం లేదు. మేము పనికి వెళ్ళినప్పుడు బయట వస్తువులు దొంగిలిస్తున్నాడు. దీనివల్ల మాకు అవమానంగా ఉంది, పోలీసుల వేధింపులు కూడా తప్పడం లేదు. వాడిని అదుపు చేయడానికి వేరే దారి లేక ఇలా చేయాల్సి వచ్చింది” అని వారు వాంగ్మూలం ఇచ్చారు.
చట్టపరమైన చర్యలు:
తమ కొడుకు బాగు కోసమే ఇలా చేశామని తల్లిదండ్రులు వాదించినప్పటికీ, పోలీసులు దీనిని తీవ్రంగా పరిగణించారు. జువైనల్ జస్టిస్ యాక్ట్ (Juvenile Justice Act) కింద తల్లిదండ్రులపై కేసు నమోదు చేశారు. ప్రస్తుతం బాలుడిని శిశు సంరక్షణ కేంద్రానికి తరలించి, అతడికి కౌన్సెలింగ్ ఇస్తున్నారు.