ఆపదలు, అత్యవసర సమయాల్లో దేశ సరిహద్దులను కాపాడే భారత సైనికులు, ప్రజలు ఇబ్బందుల్లో ఉన్నప్పుడు కూడా తమ మానవత్వాన్ని చాటుకుంటూ దేవదూతల్లా మారుతున్నారు.
దీనికి నిదర్శనంగా, నడిరోడ్డుపై ఎలక్ట్రిక్ కారు చార్జింగ్ అయిపోయి ఇబ్బంది పడుతున్న ఒక మహిళకు, భారత ఆర్మీ జవాన్ ఒకరు మండుతున్న ఎండను సైతం లెక్కచేయకుండా కారును నెట్టుకుంటూ వెళ్లి సహాయం చేసిన హృదయ విదారక వీడియో ప్రస్తుతం సోషల్ మీడియాలో వైరల్ అవుతూ ప్రశంసలు అందుకుంటోంది.
బ్యూటీ, లైఫ్స్టైల్ వీడియోలను పోస్ట్ చేసే ప్రముఖ యూట్యూబర్ ‘దీపికా శర్మ’ ఈ భావోద్వేగ సంఘటనను తన ఇన్స్టాగ్రామ్ పేజీలో పంచుకున్నారు. ఆమె తన పోస్ట్లో.. “ఉదయం నేను ఇంటి నుండి బయలుదేరినప్పుడు నా ఎలక్ట్రిక్ కారులో 60 శాతం చార్జింగ్ ఉంది. కానీ, తిరిగి వచ్చేటప్పుడు జరిగిన కొన్ని పొరపాట్ల వల్ల కారు చార్జింగ్ వేగంగా తగ్గిపోవడం ప్రారంభమైంది. ఒకానొక దశలో కారు ఏసీని కూడా బంద్ చేశాను, అయినా ఫలితం లేకపోయింది” అని తాను ఎదుర్కొన్న కష్ట పరిస్థితిని వివరించారు.
కారులో చార్జింగ్ 10 శాతానికి పడిపోగానే, ఆమె సమీపంలోని చార్జింగ్ స్టేషన్ కోసం వెతుకుతూ కారును నడిపారు. కానీ, దురదృష్టవశాత్తూ ఆ కేంద్రానికి చేరుకునే ముందే చార్జింగ్ కేవలం 2 శాతానికి పడిపోయి, ఆ తర్వాత పూర్తిగా జీరో అయిపోయి కారు నడిరోడ్డుపైనే ఆగిపోయింది. తర్వాత ఏం చేయాలో పాలుపోక ఇబ్బంది పడుతున్న దీపికా శర్మ, అక్కడ నిలబడి ఉన్న ‘నరేంద్ర’ అనే భారత సైనికుడిని సమీపంలోని చార్జింగ్ స్టేషన్కు దారి మాత్రమే అడిగారు. కానీ, ఆ ఆర్మీ జవాన్ కేవలం దారి చూపించడంతోనే ఆగకుండా, మండుటెండను కూడా లెక్కచేయకుండా కారును చార్జింగ్ స్టేషన్ వరకు నెట్టుకుంటూ వెళ్లడానికి సహాయం చేయడం ప్రారంభించారు.
సైనికుడి మానవతా దృక్పథానికి ముగ్ధురాలైన దీపికా, వీడియో రికార్డ్ చేస్తున్నప్పుడే భావోద్వేగానికి గురై కన్నీళ్లు పెట్టుకున్నారు. “నేటి స్వార్థపూరిత ప్రపంచంలో ఎవరూ సహాయం చేయడానికి ముందుకు రారు. నా స్వంత తప్పు వల్లే ఈ పరిస్థితి ఏర్పడినప్పటికీ, నాకు సహాయం చేయడానికి భారత సైనికుడు వచ్చారు. భారత ఆర్మీకి నా హృదయపూర్వక సెల్యూట్” అని పేర్కొన్నారు. అంతేకాకుండా, ఆ సైనికుడు కారు చార్జ్ అయ్యే వరకు అరగంట పాటు అక్కడే వేచి ఉండి, దీపికా సురక్షితంగా ప్రధాన రహదారికి చేరుకునేలా చూసిన తర్వాతే అక్కడి నుండి బయలుదేరారు. ఈ వీడియోను చూసిన లక్షలాది మంది నెటిజన్లు, “నిజమైన సూపర్ హీరోలు ఆర్మీ యూనిఫాంలోనే ఉంటారు” అంటూ ఆ జవాన్ను కొనియాడుతున్నారు.