చండీగఢ్: తన భార్యను హత్య చేసిన కేసులో నాలుగేళ్లుగా పోలీసుల కళ్లు గప్పి తిరుగుతున్న భారత సైన్యపు మాజీ కెప్టెన్‌ను పంజాబ్ పోలీసులు ఎట్టకేలకు అరెస్ట్ చేశారు. నిందితుడు సందీప్ తోమర్‌ను మధ్యప్రదేశ్‌లోని పాండుర్నా జిల్లాలో పోలీసులు పట్టుకున్నారు.
నిందితుడి బ్యాంక్ లావాదేవీలపై నిఘా ఉంచిన పోలీసులకు, అతను ఒక ఎల్‌పీజీ (LPG) సిలిండర్ బుక్ చేయడంతో అతని ఆచూకీ దొరికింది. పంజాబ్-హర్యానా హైకోర్టు 2022లో ఇతని శిక్షను ఖరారు చేసినప్పటి నుండి ఇతను పరారీలో ఉన్నాడు.
పాన్ కార్డ్ ద్వారా దొరికిన క్లూ:
సందీప్ తోమర్ మామగారు తన అల్లుడిని అరెస్ట్ చేయాలని కోర్టులో పిటిషన్ వేయడంతో ఈ దర్యాప్తు వేగవంతమైంది. ఎస్పీ ఆస్వంత్ సింగ్ నేతృత్వంలో ఏర్పడిన ప్రత్యేక దర్యాప్తు బృందం (SIT), నేషనల్ ఇంటెలిజెన్స్ గ్రిడ్ సహాయంతో నిందితుడి అసలు పాన్ కార్డ్ (PAN Card) వివరాలను సేకరించింది. ఆ పాన్ కార్డుతో అనుసంధానమై ఉన్న బ్యాంక్ ఖాతాలను గుర్తించగా, ఒక ప్రైవేట్ కంపెనీ అతనికి ప్రతి నెలా జీతం జమ చేస్తున్నట్లు తెలిసింది. ఆ ఖాతాకు లింక్ అయిన మొబైల్ నంబర్ ద్వారా అతను పాండుర్నా జిల్లాలో ఉన్నట్లు పోలీసులు నిర్ధారించుకున్నారు.
గ్యాస్ సిలిండర్ బుకింగ్‌తో దొరికిపోయాడు:
బ్యాంక్ స్టేట్‌మెంట్‌ను క్షుణ్ణంగా పరిశీలించిన పోలీసులకు, భారత్ గ్యాస్ సిలిండర్ కోసం జరిగిన ఒక లావాదేవీ కనిపించింది. వెంటనే గ్యాస్ ఏజెన్సీని సంప్రదించిన పోలీసులకు, ఆ సిలిండర్ డెలివరీ అయిన అద్దె ఇంటి చిరునామా దొరికింది. దీని ఆధారంగా పంజాబ్ పోలీసులు మధ్యప్రదేశ్ పోలీసుల సహాయంతో నిందితుడిని అదుపులోకి తీసుకున్నారు.
అసలు ఏం జరిగింది?
సందీప్ తోమర్ గతంలో ’12 బీహార్ రెజిమెంట్’లో కెప్టెన్‌గా ఉంటూ అబోహర్ కంటోన్మెంట్‌లో పనిచేసేవాడు. 2014లో తన భార్య శ్వేతను గొంతు నులిమి హత్య చేసి, దానిని ఆత్మహత్యగా చిత్రీకరించే ప్రయత్నం చేశాడు. కోర్టు అతనికి జీవిత ఖైదు విధించడంతో పాటు సైన్యం నుండి బర్తరఫ్ చేసింది. 2019లో బెయిల్‌పై బయటకు వచ్చిన అతను, 2022లో హైకోర్టు తన శిక్షను సమర్థించిన తర్వాత పరారయ్యాడు. పట్టుబడకుండా ఉండేందుకు దేశంలోని వివిధ ప్రాంతాల్లో తలదాచుకున్నాడు.