ఐపీఎల్ 19వ సీజన్ కు ముందు కోల్‌కతా నైట్ రైడర్స్ మెంటార్ డ్వేన్ బ్రావో తీవ్ర ఇబ్బందికర పరిస్థితిని ఎదుర్కొన్నారు. ఒక మీడియా సమావేశంలో ఆయన చేసిన వ్యాఖ్యలు ఇప్పుడు సోషల్ మీడియాలో దుమారం రేపుతున్నాయి. బ్రావో ఆ మాటలు బయటపడాలని అనుకోలేదు కానీ, దురదృష్టవశాత్తూ అప్పటికే మైకులు ఆన్ లో ఉన్నాయి.
అసలేం జరిగింది? KKR హెడ్ కోచ్ అభిషేక్ నాయర్, అసిస్టెంట్ కోచ్ షేన్ వాట్సన్ మరియు కెప్టెన్ అజింక్య రహానేలతో కలిసి బ్రావో వేదికపై ఉన్నారు. అందరూ ఒకరినొకరు పలకరించుకుంటున్న సమయంలో బ్రావో, షేన్ వాట్సన్‌తో మాట్లాడుతూ.. “వీళ్లు (KKR యాజమాన్యం) నాకు ఫోన్ చేసినప్పుడు, నా ఇంట్లో ఇద్దరు అమ్మాయిలు (chicks) ఉన్నారు” అని నవ్వుతూ చెప్పారు.
అక్కడే ఉన్న కెప్టెన్ అజింక్య రహానే వెంటనే అప్రమత్తమై.. “మైకులు ఆన్ లో ఉన్నాయి” అని బ్రావోకు సైగ చేశాడు. అది వినగానే బ్రావో ముఖం పాలిపోయింది. “షిట్ (Shit)” అని గట్టిగా అనుకుంటూ ఒక్కసారిగా ఖంగుతిన్నాడు. ఆ తర్వాత మిగతా వారు కూడా చాలా జాగ్రత్తగా వ్యవహరించారు.
సోషల్ మీడియాలో విమర్శలు: బ్రావో చేసిన ఈ వ్యాఖ్యలపై నెటిజన్లు మండిపడుతున్నారు.
- “కోచ్, కెప్టెన్ ఉన్న ప్రెస్ కాన్ఫరెన్స్‌లో ఇలాంటి దిగజారుడు మనస్తత్వంతో మాట్లాడటం సిగ్గుచేటు” అని ఒక యూజర్ ఎక్స్ (X) లో రాశారు.
- ప్రొఫెషనల్ వాతావరణంలో మహిళలను కించపరిచేలా మాట్లాడటం సరికాదని, దీనిపై వివరణ ఇవ్వాలని మరికొందరు డిమాండ్ చేస్తున్నారు.
గతంలో హార్దిక్ పాండ్యా కూడా ‘కాఫీ విత్ కరణ్’ షోలో ఇలాగే మహిళల గురించి వివాదాస్పద వ్యాఖ్యలు చేసి నిషేధానికి గురైన విషయాన్ని ఈ సందర్భంగా నెటిజన్లు గుర్తు చేస్తున్నారు.