ఎల్లప్పుడూ 18 ఏళ్ల యువకుడిలా యవ్వనంగా, అసలు మరణమే లేకుండా జీవించాలనే వింత కోరికతో రకరకాల ప్రయోగాలు చేస్తున్న అమెరికన్ బయో-హ్యాకర్, ప్రముఖ వ్యాపారవేత్త బ్రయాన్ జాన్సన్ (Bryan Johnson – 48) ఒక అరుదైన ఆరోగ్య సమస్య బారిన పడ్డారు.
శరీరాన్ని యవ్వనంగా ఉంచుకోవడానికి సొంత కొడుకు రక్తాన్ని (ప్లాస్మా) ఎక్కించుకోవడమే కాకుండా, ఏడాదికి దాదాపు 2 మిలియన్ డాలర్లు (సుమారు ₹16 కోట్లు) ఖర్చు చేస్తున్న ఈయనకు ప్రకృతి మరో రూపంలో బ్రేక్ వేసింది.
సోషల్ మీడియా పోస్ట్లో బ్రయాన్ వెల్లడించిన నిజాలు
దీనిపై బ్రయాన్ జాన్సన్ తన సోషల్ మీడియా వేదికగా స్పందిస్తూ.. రెండు చేదు వార్తలను, ఒక మంచి వార్తను పంచుకున్నారు.
బ్రయాన్ జాన్సన్ మాటల్లో:
“నాకు ‘ఆటోఇమ్యూన్ గ్యాస్ట్రైటిస్’ (Autoimmune Gastritis – AIG) అనే అరుదైన వ్యాధి ఉన్నట్లు నిర్ధారణ అయింది. ఈ వ్యాధిలో నా శరీరంలోని రోగనిరోధక శక్తే (Immune System) నా కడుపు లోపలి భాగాన్ని దెబ్బతీస్తుంది. ప్రపంచ జనాభాలో 2 నుండి 5 శాతం మందికి ఈ సమస్య తెలియకుండానే ఉండే అవకాశం ఉంది. ఇవే ఆ రెండు చేదు వార్తలు.”
అయితే, “ఆధునిక వైద్యశాస్త్రం ప్రకారం దీనికి పూర్తి విరుగుడు (Cure) లేకపోయినా, దీనిని అదుపులో ఉంచవచ్చు. నేను దీనికి ఖచ్చితమైన పరిష్కారాన్ని కనుగొనబోతున్నాను.. ఇదే ఆ ఒకే ఒక్క మంచి వార్త” అని ఆయన ఆశాభావం వ్యక్తం చేశారు.
వ్యాధికి గల కారణాలు.. ముప్పు వివరాలు
ఇటీవల జరిగిన వైద్య పరీక్షల్లో తేలిన ఈ సమస్య కారణంగా శరీరంలో పోషకాహార లోపం (ముఖ్యంగా విటమిన్ B12 లోపం), తీవ్ర రక్తహీనత (Anemia) మరియు భవిష్యత్తులో కడుపుకు సంబంధించిన క్యాన్సర్ వచ్చే ప్రమాదం చాలా రెట్లు పెరుగుతుందని వైద్య నివేదికలు చెబుతున్నాయి.
తాను చిన్నతనంలో తిన్న జంక్ ఫుడ్స్, చక్కెర పానీయాలు, అలాగే 25 ఏళ్ల వయసులో అనుభవించిన తీవ్రమైన మానసిక ఒత్తిడి, ఊబకాయం (Obesity) వంటివే ఈ వ్యాధికి మూల కారణాలు కావచ్చు అని బ్రయాన్ జాన్సన్ భావోద్వేగంతో పంచుకున్నారు. గతంలో ఈయన భారతదేశ పర్యటనకు వచ్చినప్పుడు ఇక్కడి వాయు కాలుష్యం కారణంగా తన కార్యక్రమాలను మధ్యలోనే రద్దు చేసుకుని వెళ్లిన విషయం తెలిసిందే. ఇప్పుడు ఆయన ఈ వ్యాధి బారిన పడటం ఇంటర్నెట్లో పెద్ద చర్చకు దారితీసింది.