దుబాయ్ నుంచి ఇజ్రాయెల్‌లోని టెల్ అవీవ్ నగరానికి వెళ్తున్న ఫ్లైదుబాయ్ ప్రయాణికుల విమానంలో, సుమారు 180 మంది ప్రయాణికులు తమ ప్రయాణాన్ని సాఫీగా ప్రారంభించారు.
కానీ, నడి ఆకాశంలో ఎవరూ ఊహించని ఒక భయానక సంఘటన చోటుచేసుకుంది.
విమానం కాక్‌పిట్ లోపలే, తోటి కో-పైలట్ ప్రధాన కెప్టెన్ స్మిత్ మచ్చార్‌పై అకస్మాత్తుగా కత్తితో దారుణ దాడికి పాల్పడ్డాడు. రక్తపు మడుగులో ఉన్న కెప్టెన్‌ను బయటకు తోసేసి, విమానాన్ని కిందికి దించి పెను విధ్వంసం సృష్టించేందుకు ఆ దుండగుడు ప్రయత్నించగా.. ఆటోపైలట్ అదుపుతప్పి విమానం అత్యంత వేగంగా కిందకు దూసుకుపోవడం ప్రారంభించింది.
సరిగ్గా అదే సమయంలో, విమానంలో ప్రయాణిస్తున్న నీనా మనేస్ అనే 6 ఏళ్ల చిన్నారికి వాష్‌రూమ్‌కు వెళ్లాల్సి రావడంతో, ఆమె తల్లి తాలి మనేస్ చిన్నారిని తీసుకుని ముందు భాగానికి వెళ్లారు. అప్పుడే కాక్‌పిట్ తలుపు వెనుక నుంచి వినిపించిన భయానక అరుపులను, తలుపు తెరుచుకుని రక్తపు గాయాలతో పైలట్ కుప్పకూలడాన్ని చూసిన ఆ తల్లి తీవ్ర దిగ్భ్రాంతికి గురై కేకలు వేసింది.
ఆ కేకలు విని పరిగెత్తుకుంటూ వచ్చిన చిన్నారి తండ్రి స్వికా మనేస్, విమానం అదుపుతప్పి నిలువుగా కిందకు పడిపోతున్న సమయంలో.. తన కూతురు “నాన్నా మనం చనిపోవడం నాకు ఇష్టం లేదు” అని భయంతో ఏడుస్తున్న మాటలు విని పరిస్థితి తీవ్రతను అర్థం చేసుకున్నాడు.
వెంటనే స్పందించిన కొందరు ప్రయాణికులు, తమ ప్రాణాలను సైతం లెక్కచేయకుండా కాక్‌పిట్‌లోకి దూసుకెళ్లారు. వారిలో యానివ్ అనే ప్లంబింగ్ కార్మికుడు సాహసోపేతంగా ముందుకు వెళ్లి, విమానం కంట్రోల్ లివర్‌ను పట్టుకుని విమానాన్ని అదుపులోకి తెచ్చేందుకు ప్రయత్నించడమే కాకుండా, దాడి చేసిన వ్యక్తిని కిందకు నెట్టేసి వీరోచితంగా పోరాడాడు.
ఆ తర్వాత ప్రయాణికులు తమ హెడ్‌ఫోన్ వైర్లను ఉపయోగించి, సుమారు 20 నుంచి 25 నిమిషాల పాటు పోరాడి ఆ దుండగుడిని గట్టిగా బంధించారు. అదే సమయంలో, విమానంలో ఉన్న ఒక వైద్యుడు గాయపడిన పైలట్‌కు ప్రథమ చికిత్స అందించి ప్రాణాలు కాపాడాడు.
ఈ ఊహించని పరిణామంలో ప్రయాణికులు, సిబ్బంది ప్రదర్శించిన ఈ సాహసం కారణంగా పెను విధ్వంసం తప్పి, విమానాన్ని సౌదీ అరేబియాలోని తబుక్ విమానాశ్రయంలో సురక్షితంగా ల్యాండ్ చేశారు.
Leave a Reply