ముంబై: టీ20 ప్రపంచకప్ 2026లో టీమిండియా ఫేవరెట్‌గా బరిలోకి దిగి, అంచనాలను నిజం చేస్తూ టైటిల్ గెలిచి చరిత్ర సృష్టించింది. ఈ విజయం హెడ్ కోచ్ గౌతమ్ గంభీర్‌కు అత్యంత ప్రత్యేకం. కోచ్‌గా ఆయనకు ఇది రెండో ఐసీసీ టైటిల్. దీంతో ఆటగాడిగా మరియు కోచ్‌గా ఐసీసీ ట్రోఫీలను గెలుచుకున్న అరుదైన రికార్డును గంభీర్ సొంతం చేసుకున్నారు.
ఈ మెగా టోర్నీకి ముందు గంభీర్ సామర్థ్యంపై అనేక విమర్శలు వచ్చాయి. అయితే ప్రపంచకప్ గెలవడంతో విమర్శకుల నోళ్లు మూతపడ్డాయి. ఈ విజయం అనంతరం గంభీర్ ఒక ప్రత్యేక వ్యక్తికి కృతజ్ఞతలు తెలిపారు.
‘ఓటమి తర్వాత ఆ ఒక్కరే ఫోన్ చేశారు’
టీమిండియా గెలిచిన తర్వాత హెడ్ కోచ్ గౌతమ్ గంభీర్ బిసిసిఐ (BCCI) కార్యదర్శి జై షాకు ప్రత్యేకంగా ధన్యవాదాలు తెలిపారు. ప్రెస్ కాన్ఫరెన్స్‌లో గంభీర్ మాట్లాడుతూ.. “చివరగా నేను జై భాయ్‌కి థాంక్స్ చెప్పాలి. నా కెరీర్‌లో అత్యంత క్లిష్ట పరిస్థితుల్లో ఉన్నప్పుడు ఎక్కువ మంది నాకు ఫోన్ చేయలేదు. న్యూజిలాండ్ చేతిలో లేదా సౌతాఫ్రికా చేతిలో ఓడిపోయినప్పుడు నాకు మొదట కాల్ చేసిన వ్యక్తి ఆయనే. నాపై నమ్మకం ఉంచినందుకు ఆయనకు కృతజ్ఞతలు. నేను కోచ్‌గా బాధ్యతలు చేపట్టినప్పుడు నాకు అంత అనుభవం లేదని నాకు బాగా గుర్తుంది” అని ఆవేదనతో కూడిన కృతజ్ఞతను చాటుకున్నారు.
గంభీర్ కోచింగ్ కెరీర్‌లో స్వర్ణయుగం
గౌతమ్ గంభీర్ హెడ్ కోచ్ అయిన తర్వాత రెడ్ బాల్ (టెస్టులు) క్రికెట్‌లో టీమిండియా ప్రదర్శన ఆశించిన స్థాయిలో లేదు. సొంతగడ్డపై వరుస సిరీస్ ఓటములను ఎదుర్కోవడంతో గంభీర్‌పై తీవ్ర విమర్శలు వచ్చాయి. అయితే, ఆయన హయాంలోనే టీమిండియా 2025 ఛాంపియన్స్ ట్రోఫీని, ఇప్పుడు 2026 టీ20 ప్రపంచకప్ టైటిల్‌ను గెలుచుకోవడం విశేషం. ఈ విజయాలు గంభీర్‌కు పెద్ద ఊరటనిచ్చాయి. ఆయన తదుపరి లక్ష్యం వచ్చే ఏడాది జరగనున్న వన్డే ప్రపంచకప్.