అమెరికా నుండి ఒక కలవరపరిచే వీడియో సోషల్ మీడియాలో వైరల్ అవుతోంది. అందులో ఒక భారతీయ జంటపై ఒక అపరిచిత వ్యక్తి తీవ్రమైన జాత్యహంకార వ్యాఖ్యలు చేస్తూ, “వెనక్కి ఇండియాకు వెళ్ళిపోండి” అని వేధించడం కనిపిస్తోంది. ఈ ఘటన ఎక్కడ, ఎప్పుడు జరిగిందనేది ఇంకా ధృవీకరించబడలేదు. అయితే, అమెరికాలో భారతీయులపై ఇటువంటి వివక్ష రోజురోజుకూ పెరుగుతోందని, ఎన్నారైలు మరియు భారతీయ సంతతి ప్రజలు తీవ్ర ఆగ్రహం వ్యక్తం చేస్తున్నారు.
ఈ వీడియోలో, కారులో కూర్చున్నట్లుగా ఉన్న ఒక వ్యక్తి, ఆ జంటను వారు భారతీయులా అని ప్రశ్నించడం చూడవచ్చు. అనంతరం “ఇండియా మెరుగైనదా లేక అమెరికానా?” అని అతను నిలదీశాడు. ఆ పరిస్థితిలో కూడా ఆ జంట చాలా ప్రశాంతంగా, మర్యాదగా సమాధానమిచ్చారు. తమ కుటుంబం ఇండియాలో ఉంటుందని భర్త చెప్పగా, “ఇండియా అంత బాగుంటే, అమెరికాలో ఎందుకు ఉంటున్నారు?” అని ఆ వ్యక్తి దూకుడుగా ప్రశ్నించాడు. “ప్రపంచాన్ని చూడటానికి వచ్చాం” అని అతను ప్రశాంతంగా సమాధానమిచ్చాడు.
వెంటనే ఆ అపరిచిత వ్యక్తి “మాకు మీరు ఇక్కడ వద్దు, ఇంటికి వెళ్ళిపోండి” అంటూ, మరింతగా రెచ్చిపోయి “నా దేశం విడిచి వెళ్ళిపో (Get the f*uk out of my country)” అని అరిచాడు. అయినప్పటికీ, ఆ భారతీయ వ్యక్తి ఏమాత్రం ప్రతిస్పందించకుండా సంయమనం పాటించాడు.
ఈ వీడియో సోషల్ మీడియాలో వేగంగా వ్యాపించడంతో, ఎన్నారైలు మరియు నెటిజన్లు ఆ వ్యక్తి ప్రవర్తనను తీవ్రంగా ఖండించారు. జాత్యహంకారంతో కూడిన ఈ దాడి ఎదురైనా, ఆ జంట ఎంతో సంయమనంతో వ్యవహరించిన తీరును నెటిజన్లు ప్రశంసించారు. అదే సమయంలో, ఇలాంటి వారిని మౌనంగా వదిలేయడం వల్ల వారు మరింతగా రెచ్చిపోయే అవకాశం ఉందని కొందరు అభిప్రాయపడ్డారు.
ఒక నెటిజన్ స్పందిస్తూ, “ఉత్తర టెక్సాస్లో ఇలాంటి ఘటనలు పెరుగుతున్నాయి. మీకైనా, మీకు తెలిసిన వారికైనా ఇలాంటివి ఎదురైతే వెంటనే పోలీసులకు ఫిర్యాదు చేయండి. ఆధారాలను రికార్డ్ చేసి వారికి అందించండి. మౌనంగా ఉంటే అల్లరి మూకలకు ధైర్యం పెరుగుతుంది!” అని పేర్కొన్నారు.
అంతేకాకుండా, సోషల్ మీడియాలో వ్యూస్, ఎంగేజ్మెంట్ కోసం కొంతమంది ఇన్ఫ్లుయెన్సర్లు ఉద్దేశపూర్వకంగా భారతీయులకు వ్యతిరేకంగా రెచ్చగొట్టే కంటెంట్ను సృష్టిస్తున్నారనే చర్చ కూడా మొదలైంది. ఈ వీడియోను పోస్ట్ చేసిన @AyTone4th అనే వెరిఫైడ్ ఖాతాదారుడు తాను మ్యూజిక్ ప్రొడ్యూసర్గా చెప్పుకుంటున్నాడు. ఇతనే గతంలో ఒక భారతీయ రెస్టారెంట్లోకి వెళ్లి, ఎగతాళి చేస్తూ “ఆవు పేడ” కావాలని అడిగి తీవ్ర విమర్శలు ఎదుర్కొన్నాడు.