భారత క్రికెట్ జట్టు విధ్వంసకర ఓపెనర్ అభిషేక్ శర్మ, ప్రస్తుతం భారత జట్టుతో కలిసి ఇంగ్లాండ్ పర్యటనలో ఉన్నాడు. అక్కడ జరుగుతున్న టీ20 సిరీస్లో అద్భుతంగా రాణిస్తున్నాడు. మొదటి మ్యాచ్లో 59 పరుగులు, రెండో మ్యాచ్లో 43 పరుగులు చేసి అందరినీ ఆకట్టుకున్నాడు. మైదానంలో తన బ్యాటింగ్తో ప్రత్యర్థులను భయపెడుతున్న ఈ యువ క్రికెటర్, మైదానం బయట మాత్రం ఆర్టిఫిషియల్ ఇంటెలిజెన్స్ (AI) సాంకేతికత కారణంగా తీవ్ర మానసిక వేదనకు గురవుతున్నాడు.
సోషల్ మీడియాలో తన ముఖాన్ని, పేరును దుర్వినియోగం చేస్తూ.. ఏఐ సాంకేతికత ద్వారా ఫేక్ ఫోటోలు, వీడియోలను సృష్టిస్తున్నారని ఆయన ఆరోపించారు. తన వ్యక్తిగత హక్కులను కాపాడుకోవడానికి మరియు ఈ బెదిరింపులకు చెక్ పెట్టడానికి, అభిషేక్ శర్మ తరపున ఢిల్లీ హైకోర్టులో అత్యవసర పిటిషన్ దాఖలు చేశారు.
తన అనుమతి లేకుండా తన పేరు, ఫోటోలు లేదా గొంతును ఏఐ ఆధారిత కంటెంట్ల కోసం ఉపయోగించకూడదని ఆయన కోరారు. తన ఫోటోలు ఏ విధంగా దుర్వినియోగం అవుతున్నాయో తెలిపే ఇంటర్నెట్ ఆధారాలను కూడా ఆయన కోర్టుకు సమర్పించారు.
ఈ కేసును విచారించిన ఢిల్లీ హైకోర్టు న్యాయమూర్తి జ్యోతి సింగ్, ఆన్లైన్ ప్రపంచంలో వ్యక్తిగత హక్కులు మరియు పరువు నష్టం కలిగించే అంశాలపై అనేక గందరగోళాలు ఉన్నాయని పేర్కొన్నారు. ప్రస్తుతం తక్షణమే ఎటువంటి మధ్యంతర ఉత్తర్వులు జారీ చేయనప్పటికీ, ఆధారాలుగా పేర్కొన్న స్క్రీన్షాట్లను కోర్టులో సమర్పించాలని అభిషేక్ శర్మ న్యాయవాదిని న్యాయమూర్తి ఆదేశించారు.