పాకిస్థాన్‌లో ఒక వ్యక్తి తన భార్యను తన స్నేహితుడితో గడపమని ఒత్తిడి చేస్తూ, ఆమె నిరాకరించినందుకు తీవ్రంగా కొట్టిన వీడియో వైరల్ అవుతోంది. ఈ దారుణం వెనుక ఉన్న కారణం ‘నికా హలాలా’ (Nikah Halala) అనే వివాదాస్పద ఆచారం.
ఏమిటీ ‘హలాలా’?
ఇస్లామిక్ చట్టం ప్రకారం, ఒక వ్యక్తి తన భార్యకు మూడు సార్లు తలాక్ (Triple Talaq) చెప్పిన తర్వాత, మళ్ళీ ఆమెను పెళ్లి చేసుకోవాలంటే కొన్ని కఠినమైన నిబంధనలు ఉన్నాయి. దానినే ‘హలాలా’ అంటారు:
- ఆ మహిళ వేరొక పురుషుడిని (రెండవ భర్త) చట్టబద్ధంగా వివాహం చేసుకోవాలి.
- ఆ వివాహ బంధం సహజంగా ఉండాలి మరియు వారి మధ్య శృంగార సంబంధం జరగాలి.
- ఆ రెండో భర్త మరణించినా లేదా ఆమెకు విడాకులు ఇచ్చినా, ఆమె ‘ఇద్దా’ (Iddah – వేచి ఉండే కాలం) పూర్తి చేయాలి.
- ఆ తర్వాతే ఆమె తన మొదటి భర్తను తిరిగి వివాహం చేసుకోవడానికి అనుమతి ఉంటుంది.
దుర్వినియోగం అవుతున్న ఆచారం:
విడాకుల విషయంలో పురుషులు బాధ్యతారాహిత్యంగా వ్యవహరించకుండా ఉండటం కోసం ఈ నిబంధనను తెచ్చారు. కానీ, ప్రస్తుతం ఇది దుర్వినియోగం అవుతోంది. మొదటి భర్తను మళ్ళీ పెళ్లి చేసుకోవాలనే ఉద్దేశంతో, ‘ఒక్క రాత్రి’ కోసం లేదా ‘తాత్కాలికంగా’ ఒకరిని పెళ్లి చేసుకుని, మరుసటి రోజే విడాకులు తీసుకునే పద్ధతి పెరుగుతోంది.
ఈ వైరల్ వీడియోలో, భర్త తన భార్యకు తలాక్ చెప్పి ఉండవచ్చు, తిరిగి ఆమెను పొందడానికి తన స్నేహితుడితో ‘తాత్కాలిక హలాలా’ చేయమని ఆమెను హింసిస్తున్నట్లు తెలుస్తోంది.