సౌదీ అరేబియా స్నోఫాల్: మండే ఎండలు, ఎడారి ఇసుక తిన్నెలకు పేరుగాంచిన సౌదీ అరేబియా ఇప్పుడు మంచుతో మెరిసిపోతోంది. ఉత్తర సౌదీ అరేబియాలోని ట్రోజెనా హైలాండ్స్ మరియు తబుక్ ప్రాంతాల్లో శీతాకాలం ప్రారంభంలో భారీగా మంచు కురుస్తోంది.
తబుక్ లోని జబల్ అల్-లౌజ్ ప్రాంతంలో ఉష్ణోగ్రతలు మైనస్ డిగ్రీలకు పడిపోయాయి. సోషల్ మీడియాలో వైరల్ అవుతున్న అక్కడి ఫోటోలు, వీడియోలు చూసి జనం ఆశ్చర్యపోతున్నారు. కొందరైతే ఇవి AI సాయంతో సృష్టించినవి అని కూడా భావిస్తున్నారు.
పర్యాటకుల సందడి
సౌదీ గెజెట్ నివేదిక ప్రకారం, ట్రోజెనా హైలాండ్స్ ప్రాంతంలో తేలికపాటి నుండి మోస్తరు వర్షంతో పాటు మంచు కురిసింది. బీర్ బిన్ హిర్మాస్, అల్-ఉయనా, హలాత్ అమ్మార్ మరియు శిగ్రి వంటి ప్రాంతాల్లో కూడా మంచు కురిసినట్లు వార్తలు వచ్చాయి. సముద్ర మట్టానికి 2580 మీటర్ల ఎత్తులో ఉన్న జబల్ అల్-లౌజ్ (బాదం పర్వతం) ప్రాంతంలో మంచు కురవడం స్థానికులను మరియు పర్యాటకులను విశేషంగా ఆకర్షిస్తోంది.
సౌదీ అరేబియా వాతావరణ శాఖ (NCM) రియాద్, తూర్పు ప్రావిన్స్ మరియు ఉత్తర సరిహద్దుల్లో ఉరుములతో కూడిన వర్షాలు కురిసే అవకాశం ఉందని హెచ్చరించింది. సాధారణంగా పర్వత ప్రాంతాల్లో మంచు కురవడం అసాధారణమేమీ కాకపోయినప్పటికీ, ఈసారి కురుస్తున్న భారీ మంచు అందరి దృష్టిని ఆకర్షిస్తోంది.
ప్రవక్త మహమ్మద్ జోస్యం మరియు సోషల్ మీడియా చర్చ
సోషల్ మీడియాలో చాలా మంది వినియోగదారులు ఈ మార్పును ప్రవక్త మహమ్మద్ చేసిన ఒక జోస్యంతో ముడిపెడుతున్నారు. ఆయన చెప్పిన దాని ప్రకారం— “అంతిమ కాలంలో (ప్రపంచ అంతానికి ముందు) అరేబియా ద్వీపకల్పం మళ్లీ పచ్చదనంతో నిండిపోయి, నదులు ప్రవహిస్తాయి”.
ఎడారిలో మంచు కురవడం వల్ల నేలలో తేమ పెరిగి, అది పచ్చదనానికి దారితీస్తుందని, తద్వారా ఈ జోస్యం నిజమవుతోందని మరియు ప్రపంచ అంతం దగ్గర పడిందని నెటిజన్లు చర్చించుకుంటున్నారు. ఈ మార్పు ప్రకృతి సమతుల్యతలో మార్పులను సూచిస్తుందా లేక సౌదీ వ్యవసాయ రంగంలో కొత్త అవకాశాలను తెస్తుందా అన్నది వేచి చూడాలి.