మధ్యప్రాచ్యంలో ఇరాన్ మరియు అమెరికా-ఇజ్రాయెల్ యుద్ధం కారణంగా ఇంధన సంక్షోభం ప్రపంచవ్యాప్తంగా కనిపిస్తోంది. భారత్‌లో కూడా గ్యాస్ కొరత తీవ్రంగా ఉంది. ఈ క్రమంలో కొన్ని రెస్టారెంట్లు మూతపడగా, మరికొన్ని రెస్టారెంట్లు బిల్లులో ఏకంగా ‘గ్యాస్ క్రైసిస్ ఛార్జ్’ (గ్యాస్ సంక్షోభ రుసుము)ను వసూలు చేయడం మొదలుపెట్టాయి.
బెంగుళూరు కేఫ్‌లో వింత ఘటన: బెంగుళూరులోని ‘థియో కేఫ్’ (Theo Cafe)కు వెళ్లిన ఒక కస్టమర్ రెండు ‘మింట్ లెమనేడ్’ (పుదీనా నిమ్మరసం) ఆర్డర్ చేశారు. ఒక గ్లాసు ధర ₹179 కాగా, రెండు గ్లాసులకు ₹358 అయ్యింది. అయితే బిల్లులో అదనంగా 5 శాతం ‘గ్యాస్ క్రైసిస్ ఛార్జ్’ కింద ₹17.01 కలిపారు. ఇతర పన్నులతో కలిపి మొత్తం బిల్లు ₹374 అయ్యింది. దేశంలో ఎల్‌పీజీ గ్యాస్ సరఫరా తగ్గిన వార్తల నేపథ్యంలో ఈ అదనపు వసూళ్లు చర్చనీయాంశమయ్యాయి.
సోషల్ మీడియాలో విమర్శలు: ఈ బిల్లు సోషల్ మీడియాలో వైరల్ కావడంతో నెటిజన్లు తీవ్రంగా స్పందిస్తున్నారు. “అసలు నిమ్మరసం చేయడానికి గ్యాస్ స్టవ్ ఎందుకు వాడతారు?” అని ఒకరు ప్రశ్నించగా, “ఇంధన సంక్షోభం పేరుతో ఇలా అదనపు ఛార్జీలు వసూలు చేయడం వినియోగదారుల రక్షణ చట్టం 2019 ప్రకారం చట్టవిరుద్ధం” అని మరికొందరు మండిపడుతున్నారు. దీనిపై అధికారులు చర్యలు తీసుకోవాలని డిమాండ్ చేస్తున్నారు.