గురువారం వాషింగ్టన్‌లో జరిగిన ‘బోర్డ్ ఆఫ్ పీస్’ సమావేశంలో పాకిస్థాన్ ప్రధాని షెహబాజ్ షరీఫ్‌కు వరుసగా అవమానకరమైన పరిస్థితులు ఎదురయ్యాయి. గతేడాది భారత్-పాక్ ఘర్షణలో అమెరికా అధ్యక్షుడు డొనాల్డ్ ట్రంప్ జోక్యం చేసుకున్నారంటూ, ఆయనను ప్రసన్నం చేసుకునేందుకు షరీఫ్ చేసిన ప్రయత్నాలు సోషల్ మీడియాలో మీమ్స్ (memes) కు దారితీశాయి.
షెహబాజ్ షరీఫ్.. నిలబడు! ఒకానొక సందర్భంలో, ట్రంప్ షెహబాజ్ షరీఫ్‌ను నిలబడమని కోరుతూ.. భారత ప్రధాని నరేంద్ర మోదీ గురించి ప్రశంసలు ప్రారంభించారు. తనకు మోదీతో మంచి స్నేహం ఉందని, షరీఫ్ గురించి తనకు తెలిసింది చాలా తక్కువని ట్రంప్ వ్యాఖ్యానించారు. ఆ సమయంలో షరీఫ్ ముఖ కవళికలు వింతగా మారడాన్ని నెటిజన్లు ఎత్తిచూపుతున్నారు.
ట్రంప్ మాట్లాడుతూ.. “నేను ప్రధాని మోదీతో మాట్లాడాను. ఆయన చాలా ఉత్సాహంగా ఉన్నారు. ప్రస్తుతం ఆయన మనల్ని చూస్తున్నారు. భారత్ మరియు పాకిస్థాన్.. అది ఒక పెద్ద విషయం. మీరు ఒక్క క్షణం నిలబడండి” అంటూ షరీఫ్‌ను ఒక యజమానిలా ఆదేశించారు.
అవమానకరమైన క్షణం: “నేను వారిద్దరితో (మోదీ, షరీఫ్) ఫోన్‌లో మాట్లాడాను. నాకు షరీఫ్ కొంచమే తెలుసు, కానీ ప్రధాని మోదీ మాత్రం చాలా బాగా తెలుసు. పాకిస్థాన్‌తో వ్యాపారం ద్వారా నాకు పరిచయం ఏర్పడింది. వారు చాలా లాభదాయకమైన డీల్ కోసం ప్రయత్నించేవారు, దాని వల్ల నాకు కొంచెం కోపం వచ్చేది” అని ట్రంప్ జోడించారు. చివరలో షరీఫ్‌ను, పాక్ ఫీల్డ్ మార్షల్ అసిమ్ మునీర్‌ను ట్రంప్ ప్రశంసించినప్పటికీ, అంతకుముందు జరిగిన అవమానమే ఇప్పుడు ఇంటర్నెట్‌లో వైరల్ అవుతోంది.
షరీఫ్ ‘అతివినయం’: సమావేశ అజెండా కంటే ట్రంప్‌ను పొగడటానికే షరీఫ్ ఎక్కువ ఆసక్తి చూపారు. ట్రంప్‌ను ‘శాంతి కాముకుడు’ అని, ‘దక్షిణాసియా రక్షకుడు’ అని అభివర్ణించారు. “భారత్-పాక్ మధ్య కాల్పుల విరమణ కోసం మీరు చేసిన సమయానుకూల జోక్యం లక్షలాది మంది ప్రాణాలను కాపాడింది” అని షరీఫ్ పేర్కొన్నారు.
సీజ్‌ఫైర్ క్రెడిట్ కోసం ట్రంప్ ప్రయత్నం – భారత్ తిరస్కరణ: గతేడాది మే 10 నుండి ట్రంప్ సుమారు 80 సార్లు భారత్-పాక్ ఘర్షణను ఆపిన క్రెడిట్ తనదే అని చెప్పుకున్నారు. అయితే భారత్ ఏ మూడవ పక్షం జోక్యాన్ని అంగీకరించలేదు. ఏప్రిల్ 22న పహల్గామ్ దాడికి నిరసనగా భారత్ ‘ఆపరేషన్ సింధూర్’ చేపట్టిందని, కాల్పుల విరమణ అనేది ఇరు దేశాల మిలిటరీ ఆపరేషన్స్ డైరెక్టర్ జనరల్స్ (DGMOs) మధ్య జరిగిన ప్రత్యక్ష చర్చల ఫలితమని భారత్ స్పష్టం చేసింది. కానీ షరీఫ్ మాత్రం ఆ క్రెడిట్‌ను ట్రంప్‌కు ఇచ్చేందుకు తాపత్రయపడ్డారు.