“డాక్టర్ కావాలనే ఆశ ఉంటే సరిపోదు.. డాక్యుమెంట్స్ అన్నీ పక్కాగా ఉండాలి!” నీట్ 2026 పరీక్షకు సిద్ధమవుతున్న లక్షలాది మంది విద్యార్థులకు నేషనల్ టెస్టింగ్ ఏజెన్సీ (NTA) ఒక ముఖ్యమైన హెచ్చరిక జారీ చేసింది.
నేషనల్ టెస్టింగ్ ఏజెన్సీ నిన్న (జనవరి 5) ఒక అత్యవసర ప్రకటన విడుదల చేస్తూ.. “చదువు తర్వాత, ముందు మీ ఆధార్ కార్డును సరిచూసుకోండి” అని సూచించింది.
ముందు జాగ్రత్త ఎందుకు? NTA ఆదేశాలు ఏమిటి?
నీట్ 2026 దరఖాస్తుల ప్రక్రియ ఫిబ్రవరి నెలలో ప్రారంభమయ్యే అవకాశం ఉంది. చివరి నిమిషంలో సర్వర్ సమస్యలు, ఆందోళన కలగకుండా ఉండాలంటే ఇప్పుడే కొన్ని పత్రాలను అప్‌డేట్ చేసుకోవాలని NTA తెలిపింది.
1. ఆధార్ కార్డు (Aadhaar Card) – అత్యంత ముఖ్యం: దరఖాస్తు చేసే ప్రతి విద్యార్థికి ఆధార్ తప్పనిసరి. అందులోని వివరాలు ఖచ్చితంగా ఉండాలి.
- పేరు (Name): 10వ తరగతి మార్కుల జాబితాలో ఉన్నట్టుగానే ఆధార్‌లో పేరు ఉండాలి. ఇంటిపేరు (Initial) ముందు వెనుకల మారినా సమస్య తప్పదు.
- పుట్టిన తేదీ & లింగం: ఇవి సరిగ్గా ఉన్నాయో లేదో చెక్ చేసుకోండి.
- ఫోటో (Photo): ఆధార్‌లో చిన్నప్పటి ఫోటో ఉంటే, వెంటనే ఈ-సేవా కేంద్రానికి వెళ్లి లేటెస్ట్ ఫోటోను అప్‌డేట్ చేయండి.
- బయోమెట్రిక్ & అడ్రస్: ఇవి కూడా అప్‌డేట్‌గా ఉండాలి.
- మొబైల్ నంబర్: ఆధార్‌కు లింక్ అయిన మొబైల్ నంబర్ పనిలో ఉందో లేదో చూడండి. OTP దానికే వస్తుంది.
2. కుల ధృవీకరణ పత్రం (Category Certificate): రిజర్వేషన్ కోరుకునే వారు (SC, ST, OBC-NCL, EWS) ప్రభుత్వం నిర్దేశించిన నిబంధనల ప్రకారం అప్‌డేట్ చేసిన సర్టిఫికెట్‌ను సిద్ధంగా ఉంచుకోవాలి. పాతవి ఉంటే ఇప్పుడే కొత్త వాటి కోసం దరఖాస్తు చేసుకోండి.
3. దివ్యాంగుల ధృవీకరణ పత్రం (UDID Card): PwD కేటగిరీలో దరఖాస్తు చేసేవారు తమ UDID కార్డు గడువు ముగియకుండా (Renewed) ఉందో లేదో చూసుకోవాలి.
పరీక్ష ఎప్పుడు?
నీట్ 2026 పరీక్ష మే 3, 2026 (ఆదివారం) నిర్వహించే అవకాశం ఉంది. అధికారిక ప్రకటన రానప్పటికీ, ఇదే తాత్కాలిక తేదీగా భావిస్తున్నారు. దరఖాస్తులు ఫిబ్రవరి మొదటి వారంలో ప్రారంభం కావచ్చు.
మరిన్ని వివరాల కోసం కేవలం neet.nta.nic.in వెబ్‌సైట్‌ను మాత్రమే సంప్రదించండి.