హర్యానాలోని కర్నాల్ ప్రాంతంలో వన్యప్రాణుల అక్రమ రవాణా జరుగుతోందన్న పక్కా సమాచారంతో అటవీ శాఖ మరియు పోలీసు అధికారులు ఆకస్మిక తనిఖీలు చేపట్టారు.
ఈ తనిఖీల్లో భాగంగా అక్కడ ఉన్న నీలిరంగు ప్లాస్టిక్ డ్రమ్ములను అధికారులు తెరిచి చూశారు. అందులో నీళ్లు ఉంటాయని భావించిన అధికారులకు లోపల ఉన్న దృశ్యం చూసి ఒక్కసారిగా ఫ్యూజులు ఎగిరిపోయాయి. డ్రమ్ముల లోపల ప్రాణాలతో ఉన్న అరుదైన తాబేళ్లు కనిపించడంతో తీవ్ర కలకలం రేగింది.
అధికారులు జరిపిన సోదాల్లో డ్రమ్ముల్లో దాచి ఉంచిన మొత్తం 8 సజీవ తాబేళ్లను సురక్షితంగా స్వాధీనం చేసుకున్నారు. ఎవరికీ ఎలాంటి అనుమానం రాకుండా ప్లాస్టిక్ డ్రమ్ముల్లో పెట్టి ఇతర ప్రాంతాలకు స్మగ్లింగ్ చేసేందుకు యత్నించినట్లు గుర్తించారు. ఈ తాబేళ్లను ఎక్కడి నుంచి పట్టుకొచ్చారు, ఎక్కడికి తరలించేందుకు ప్లాన్ చేశారనే దానిపై అధికారులు ఆరా తీస్తున్నారు.
వన్యప్రాణి సంరక్షణ చట్టం కింద కేసు నమోదు చేసిన అధికారులు, స్వాధీనం చేసుకున్న తాబేళ్లను సురక్షిత ప్రాంతానికి తరలించి వాటి ఆరోగ్యాన్ని పర్యవేక్షిస్తున్నారు. ఈ అక్రమ రవాణా వెనుక ఉన్న అంతర్రాష్ట్ర స్మగ్లర్ల ముఠా గుట్టు రట్టు చేసేందుకు పోలీసులు దర్యాప్తు ముమ్మరం చేశారు.