బీహార్లోని భోజ్పూర్ జిల్లాలో మనసును కలచివేసే ఘటన వెలుగులోకి వచ్చింది. పెళ్లయిన కేవలం నాలుగు రోజులకే ఓ 23 ఏళ్ల నవవధువు కట్న వేధింపులకు బలైపోయింది. జగదీష్పూర్ పోలీస్ స్టేషన్ పరిధిలోని పిలాపూర్ గ్రామంలో ఈ దిగ్భ్రాంతికర ఘటన జరిగింది.
మృతురాలి పేరు సంజు కుమారి, ఈమె బక్సర్ జిల్లా నివాసి. మే 7వ తేదీన వినోద్ పాల్తో ఆమెకు వివాహం జరిగింది. అయితే, సుఖీభవన సంసారం గురించి కలలు కన్న సంజును, కేవలం కొద్ది రోజుల్లోనే అత్తగారింటి వారు వేధించి అంతం చేశారు.
‘ఆమె శవమే బయటకు వస్తుంది’
ఈ ఘటనలో అత్యంత భయంకరమైన విషయం ఏమిటంటే సంజు అత్త ఇచ్చిన బహిరంగ హెచ్చరిక. సంజు సోదరుడు శివమ్ పాల్ తెలిపిన వివరాల ప్రకారం, మే 13న సంజు మొదటిసారి పుట్టింటికి రావాల్సి ఉంది. మే 11 రాత్రి శివమ్ తన సోదరిని పంపించే విషయం గురించి అత్తగారింటి వారితో ఫోన్లో మాట్లాడుతుండగా, అత్త ఫోన్లో అరుస్తూ.. “నీ సోదరి ఈ ఇంటి నుండి ప్రాణాలతో వెళ్లదు, ఇక ఆమె శవమే బయటకు వస్తుంది” అని బెదిరించింది. ఈ బెదిరింపు వింటుండగానే ఫోన్లో సంజు అరుపులు వినిపించాయని, ఆ వెంటనే ఫోన్ కట్ అయిందని శివమ్ తెలిపాడు.
బంగారు గొలుసు కోసం వేధింపులు
పెళ్లిలో 4 లక్షల రూపాయల నగదు, బైక్, ఫ్రిజ్ మరియు నగలు ఇచ్చినప్పటికీ.. భర్త వినోద్ పాల్ బంగారు గొలుసు (Chain) కోసం సంజును వేధిస్తున్నాడని మృతురాలి కుటుంబ సభ్యులు ఆరోపించారు. ఆమెను పుట్టింటి వారితో మాట్లాడనిచ్చేవారు కాదు. భర్త, అత్త, మామ మరియు ఆడపడుచు కలిసి ఆమెను వేధిస్తూ, కొడుతూ ఉండేవారు. మే 11 రాత్రి సంజును గొంతు నులిమి హత్య చేసి, ఆనవాళ్లు తుడిచేయడానికి అత్తగారింటి వారు రాత్రికి రాత్రే ఆమె మృతదేహాన్ని స్మశానవాటికకు తీసుకెళ్లి దహనం చేశారు.
చితి ఆరిపోవస్తుండగా..
పొరుగువారు పోలీసులకు సమాచారం అందించడంతో సంజు పుట్టింటి వారికి ఈ విషయం తెలిసింది. మే 12న సంజు సోదరుడు పిలాపూర్ గ్రామానికి చేరుకునే సరికి, స్మశానంలో చితి దాదాపు ఆరిపోవచ్చింది; అక్కడ కేవలం తల పుర్రె, కాళ్ళ అవశేషాలు మాత్రమే మిగిలి ఉన్నాయి. సంజు అత్తగారింటికి వెళ్ళగా ఇంటికి తాళం వేసి ఉంది, కుటుంబమంతా పరారయ్యారు. పోలీసులు ఈ ఘటనపై కేసు నమోదు చేసి నిందితుల కోసం గాలిస్తున్నారు. పెళ్లయిన నాలుగు రోజులకే ఓ యువతి ఇలా అర్ధాంతరంగా తనువు చాలించడం ఆ ప్రాంతంలో విషాదాన్ని నింపింది.