ఛత్రపతి శంభాజీనగర్ జిల్లా వాలూజ్ ఎంఐడిసి పరిధిలోని వడ్గావ్ కొల్హాటిలో జిల్లా మొత్తాన్ని వణికించే ఘటన జరిగింది. ప్రేమ వ్యవహారాన్ని వ్యతిరేకించిన నేపథ్యంలో ఏర్పడిన వివాదంతో ఒక తల్లి తన 21 ఏళ్ల కూతురిని దారుణంగా హత్య చేసింది.
మృతురాలి పేరు నందిని రాజు ధీవరే. ఈ కేసులో తల్లి భారతి ఉమేష్ సాబ్లే, సవతి తండ్రి ఉమేష్ సాబ్లే మరియు మేనమామ అమోల్ గైక్వాడ్‌లపై హత్య కేసు నమోదైంది.
అసలేం జరిగింది? నందినికి గతంలో పెళ్లయింది, కానీ భర్తతో విడిపోయి గత మూడేళ్లుగా తల్లి దగ్గరే ఉంటోంది. ఈ క్రమంలో ఆమె కన్నడ ప్రాంతానికి చెందిన ఒక యువకుడిని ప్రేమించి పెళ్లి చేసుకోవాలనుకుంది. దీనిని తల్లి భారతి తీవ్రంగా వ్యతిరేకించింది. ఫిబ్రవరి 19న మధ్యాహ్నం ఇదే విషయంపై తల్లీకూతుళ్ల మధ్య గొడవ జరిగింది. ఆ సమయంలో నందిని.. “నువ్వు రెండో పెళ్లి చేసుకున్నావు కదా, నేను ప్రేమిస్తే రెండో పెళ్లి చేసుకోవడానికి అభ్యంతరం ఏమిటి?” అని నిలదీసింది. ఆ మాటతో ఆగ్రహం చెందిన భారతి దారుణానికి ఒడిగట్టింది.
హత్య మరియు సినిమా తరహా కుట్ర: నందిని బాత్‌రూమ్‌లో స్నానం చేస్తున్న సమయంలో, భారతి నీళ్ల బకెట్ తీసుకునే నెపంతో వెళ్లి రబ్బరు పైపుతో నందిని గొంతు నులిమి చంపేసింది. అనంతరం మృతదేహాన్ని గదిలోకి లాక్కొచ్చి బట్టలు మార్చింది. భర్త ఉమేష్, సోదరుడు అమోల్‌లను పిలిపించి సాక్ష్యాలను తుడిచిపెట్టడానికి ప్లాన్ వేసింది.
వారు ఇల్లు మారుతున్నట్లు నటించి, మృతదేహాన్ని పరుపులో (Mattress) చుట్టి ఆటోలో ఎక్కించారు. కన్నడలోని పొలంలో మృతదేహాన్ని గుట్టుచప్పుడు కాకుండా పాతిపెట్టాలని వారి ప్లాన్. అయితే, రాత్రి తొమ్మిది గంటల సమయంలో ఆటో డ్రైవర్‌కు పరుపులో ఏదో అనుమానాస్పదంగా ఉందని అనిపించింది. వెంటనే అతను వారిని దింపేసి పోలీసులకు సమాచారం ఇచ్చాడు.
పోస్టుమార్టం నివేదికలో గొంతు నులిమి చంపినట్లు తేలడంతో, పోలీసులు తమదైన శైలిలో విచారించగా తల్లి నేరాన్ని అంగీకరించింది. ప్రస్తుతం ముగ్గురు నిందితులు పోలీసుల అదుపులో ఉన్నారు.