ప్రేమించుకున్నాడు.. కలిసి జీవించాడు.. పెళ్లి చేసుకోవాలనుకున్నాడు! కానీ ఓ షరతు దగ్గర ఇద్దరి మధ్య గొడవ మొదలైంది. ప్రియురాలిని పెళ్లికి ఒప్పించేందుకు ప్రయత్నించిన ఓ యువకుడు, ఆమె అంగీకరించకపోవడంతో ఏకంగా మొబైల్ టవర్ ఎక్కి హల్‌చల్ చేశాడు. చివరకు పోలీసుల జోక్యంతో ఈ వ్యవహారం సద్దుమణిగింది.
ఈ ఘటన ఉత్తరప్రదేశ్‌కు చెందిన విశాల్, సుజాత మధ్య చోటుచేసుకున్నట్లు కథనం పేర్కొంది. బల్లియాకు చెందిన విశాల్, బిజ్నోర్‌కు చెందిన సుజాత గుజరాత్‌లోని ఓ ప్రైవేట్ కంపెనీలో కలిసి పనిచేసేవారు. ఈ పరిచయం క్రమంగా ప్రేమగా మారడంతో ఇద్దరూ సహజీవనం చేయడం ప్రారంభించారు.
కొంతకాలం తర్వాత తనను త్వరగా పెళ్లి చేసుకోవాలని సుజాత కోరింది. అయితే, విశాల్ మాత్రం ఓ షరతు పెట్టాడు.
“ముందు నా చెల్లి పెళ్లి జరగాలి.. ఆ తర్వాతే మన పెళ్లి!” అని తేల్చి చెప్పాడు.
ఈ షరతుకు సుజాత అంగీకరించలేదు. దీంతో ఇద్దరి మధ్య విభేదాలు పెరిగాయి. చివరకు విశాల్‌ను విడిచి, బాగ్‌పత్‌లో ఉంటున్న తన సోదరి ఇంటికి వెళ్లిపోయింది.
ప్రియురాలిని తిరిగి తీసుకురావాలని భావించిన విశాల్.. ఆమెను ఒప్పించేందుకు బాగ్‌పత్‌కు వెళ్లాడు. అయితే, పెళ్లి విషయంలో సుజాత తన నిర్ణయాన్ని మార్చుకోకపోవడంతో వారి మధ్య జరిగిన చర్చలు విఫలమయ్యాయి.
దీంతో తీవ్ర అసహనానికి గురైన విశాల్.. అక్కడే ఉన్న ఎత్తైన మొబైల్ టవర్‌పైకి ఎక్కి హల్‌చల్ చేశాడు. యువకుడు టవర్ పైభాగంలో ఉండటాన్ని గమనించిన స్థానికులు అక్కడ గుమిగూడారు. ఈ ఘటనతో ఆ ప్రాంతంలో కలకలం రేగింది.
సమాచారం అందుకున్న డయల్‌-112 పోలీసులు వెంటనే అక్కడికి చేరుకున్నారు. టవర్‌పై ఉన్న విశాల్‌తో చాలాసేపు మాట్లాడి, అతడిని సురక్షితంగా కిందికి దించారు.
ఆ తర్వాత పోలీసులు సుజాతను కూడా పిలిపించి ఇద్దరికీ కౌన్సెలింగ్ ఇచ్చినట్లు కథనం తెలిపింది. చివరకు విశాల్ ముందుగా తన చెల్లి పెళ్లి చేసిన తర్వాత సుజాతను పెళ్లి చేసుకుంటానన్న ప్రతిపాదనకు ఆమె అంగీకరించినట్లు సమాచారం.
అనంతరం పోలీసులు విశాల్‌కు హెచ్చరికలు చేసి, అతడిని స్వగ్రామమైన బల్లియాకు పంపించినట్లు కథనం పేర్కొంది.