ఇన్ఫ్లుయెన్సర్ ‘వృతిక పటేల్’ సోషల్ మీడియాలో చాలా యాక్టివ్గా ఉంటారు. ఇన్స్టాగ్రామ్లో ఆమెకు లక్షకు పైగా ఫాలోవర్లు ఉన్నారు. ఆమె ప్రొఫైల్ చూస్తే చాలా ఆకర్షణీయంగా కనిపిస్తుంది.
ఒక ఫోటోలో ఆమె నీలిరంగు కుర్తా ధరించి పూల మొక్కల ముందు పోజులిస్తే, మరొక ఫోటోలో టీ తాగుతూ కనిపిస్తారు. దియూ (Diu) బీచ్లో దిగిన ఫోటోలు, పాస్తా తింటున్న పోస్ట్లు.. ఇలా ఏ ఇతర లైఫ్ స్టైల్ లేదా ఫ్యాషన్ ఇన్ఫ్లుయెన్సర్లానే ఆమె కనిపిస్తారు. కానీ ఇక్కడే ఒక అసలు విషయం ఉంది – వృతిక పటేల్ నిజమైన వ్యక్తి కాదు.
వృతిక ప్రొఫైల్ ప్రస్తుతం సోషల్ మీడియాలో హల్చల్ చేస్తున్న “AI ఇన్ఫ్లుయెన్సర్స్” కోవకు చెందుతుంది. 2010 మధ్యకాలం నుండి ఇలాంటి వారు ఉన్నప్పటికీ, శక్తివంతమైన AI మోడల్స్ అందుబాటులోకి రావడంతో ఇటీవల ఈ ‘ఫేక్ క్రియేటర్ ఎకానమీ’ విపరీతంగా పెరిగింది.
AI ఇన్ఫ్లుయెన్సర్ అంటే ఏమిటి? ఇన్ఫ్లుయెన్సర్ మార్కెటింగ్ హబ్ ప్రకారం, AI ఇన్ఫ్లుయెన్సర్లు అంటే “డిజిటల్ క్యారెక్టర్లు లేదా అవతార్లు. వీటిని సృష్టించిన వారు వీటికి ఒక వ్యక్తిత్వాన్ని ఇచ్చి, సాధారణ మనుషులలాగే కనిపించేలా, ప్రవర్తించేలా రూపొందిస్తారు.”
నేడు సోషల్ మీడియాలో ఇలాంటి వేలకొద్దీ ప్రొఫైల్స్ కనిపిస్తున్నాయి. కృత్రిమ మేధ (AI) సృష్టించే అత్యంత వాస్తవిక ఫోటోలు మరియు వీడియోల వల్ల, మొదటి చూపులో వీరు నిజమైన వ్యక్తులు కాదని గుర్తించడం చాలా కష్టం. అయితే కొంచెం నిశితంగా గమనిస్తే.. చర్మం మరీ నునుపుగా ఉండటం, ఫోటోలు మరీ పాలిష్ చేసినట్లు ఉండటం వంటి గుర్తులను మనం గమనించవచ్చు.
వృతిక పటేల్ సంపాదన: అభివృద్ధి చెందుతున్న ఈ AI క్రియేటర్ల ఆర్థిక వ్యవస్థలో వృతిక పటేల్ ఒక చిన్న భాగం మాత్రమే. కానీ ఆమె సంపాదన చూస్తే ఆశ్చర్యం కలగక మానదు. బిజినెస్ ఆఫ్ ఫ్యాషన్ మ్యాగజైన్ (ఫిబ్రవరి 2026 సంచిక) ప్రకారం, ఇలాంటి ఫేక్ ఇన్ఫ్లుయెన్సర్లు బ్రాండ్ కొల్లాబరేషన్స్ మరియు సబ్స్క్రిప్షన్ మోడల్స్ ద్వారా భారీగా నగదును ఆర్జిస్తున్నారు.
వృతిక విషయానికి వస్తే, ఆమెకు ఇన్స్టాగ్రామ్లో 300 మంది సబ్స్క్రైబర్లు ఉన్నారు. ప్రతి సబ్స్క్రైబర్ నెలకు ₹399 ఫీజు చెల్లిస్తారు. అంటే కేవలం సబ్స్క్రిప్షన్ల ద్వారానే ‘ఆమె’ నెలకు ₹1,19,700 సంపాదిస్తోంది. ఇందులో బ్రాండ్ ప్రమోషన్ల ద్వారా వచ్చే ఆదాయం చేర్చలేదు. అంటే, వృతిక పటేల్ అనే AI బొమ్మ వెనుక ఉన్న వ్యక్తులు నెలకు ₹1.1 లక్షలకు పైగా సంపాదిస్తున్నారన్నమాట.
దీనిపై సోషల్ మీడియాలో భిన్నాభిప్రాయాలు వ్యక్తమవుతున్నాయి. కొందరు సమాజ విలువల గురించి ఆందోళన చెందుతుంటే, మరికొందరు ఇదంతా నల్లధనాన్ని తెల్లధనంగా మార్చుకోవడానికి చేసే ప్రయత్నమేమో అని అనుమానం వ్యక్తం చేస్తున్నారు.