ఏమిటీ కాక్రోచ్ జనతా పార్టీ? మొదట్లో ఒక వ్యంగ్య (Satire) పార్టీగా మొదలైన ‘కాక్రోచ్ జనతా పార్టీ’ క్రమంగా రాజకీయ మలుపు తిరుగుతోంది. వీరికి స్వంత మేనిఫెస్టో, థీమ్ సాంగ్ ఉన్నాయి. పంజాబ్లో సీఎం అభ్యర్థిని కూడా ప్రకటించారు. సోషల్ మీడియాలో ఈ పార్టీకి భారీగా ఫాలోవర్లు పెరుగుతున్నారు. అయితే, పార్టీ ఉనికిపై, నిబద్ధతపై భిన్నాభిప్రాయాలు వ్యక్తమవుతున్నాయి.
కులం కార్డు ఎంట్రీ: ఏ రాజకీయ పార్టీకైనా కులం, మతం అనేవి ముఖ్యమైన అంశాలు. ఇప్పటివరకు ఈ పార్టీలో ఆ లోటు ఉండేది, కానీ ఇప్పుడు అది కూడా తీరిపోయింది. పార్టీ వ్యవస్థాపకుడు అభిజీత్ దిప్కే తాను దళితుడినని సోషల్ మీడియాలో ప్రకటించడంతో వివాదం మొదలైంది. ఒక యూజర్, “మీరు రిజర్వేషన్లపై మీ వైఖరిని ఎందుకు చెప్పడం లేదు? దళితుల హక్కుల గురించి ఎందుకు మాట్లాడటం లేదు?” అని ప్రశ్నించగా, దానికి అభిజీత్ సమాధానమిస్తూ, “నేను కూడా దళితుడినే, నా సమాధానం మీకు దొరికిందని ఆశిస్తున్నాను” అని రాసుకొచ్చారు.
నెటిజన్ల భగ్గుమన్న విమర్శలు: అభిజీత్ దిప్కే ఈ ప్రకటన చేయగానే నెటిజన్లు ఆగ్రహం వ్యక్తం చేస్తున్నారు.
- కొందరు దీనిని “దళిత కార్డు” ప్లే చేయడం అని విమర్శిస్తున్నారు.
- మరొక యూజర్, “రిజర్వేషన్ ఫలాలను పొంది కూడా దేశం విడిచి పారిపోయిన నువ్వు, విదేశాల్లో కూర్చుని దళిత కార్డు ఆడుతున్నావా?” అని మండిపడ్డారు.
- మరో యూజర్, “ఇప్పుడే పార్టీ పెట్టి రెండు రోజులైంది, అప్పుడే కులం, మతం కార్డులు బయటకు తీస్తున్నావా?” అని ఎద్దేవా చేశారు.
- ఇంకొందరు, “కులం ఆధారిత రాజకీయాలు వద్దు, అభివృద్ధి గురించి మాట్లాడండి” అని సలహా ఇచ్చారు.
- ఇంకో యూజర్ వ్యంగ్యంగా, “నీ పేరును ‘మహమ్మద్ అభిజీత్ దిప్కే’ అని మార్చుకో, అప్పుడు నీ ప్యాకేజీ పూర్తవుతుంది” అని రాశారు.
అసలు కథేంటి? సుప్రీంకోర్టు విచారణ సందర్భంగా జస్టిస్ సూర్యకాంత్ చేసిన ఒక వ్యాఖ్యను (నిరుద్యోగ యువతను “కాక్రోచ్”, “పరాన్నజీవులు” అని పేర్కొనడం) ఆసరాగా చేసుకుని అభిజీత్ దిప్కే ఈ పారడీ పార్టీని ప్రారంభించారు. ఆ వ్యాఖ్యలపై చెలరేగిన వివాదాన్ని దిప్కే ఒక ఆన్లైన్ ఉద్యమంగా మార్చేశారు. ప్రస్తుతం ఇన్స్టాగ్రామ్లో ఈ పార్టీకి 2 కోట్లకు పైగా ఫాలోవర్లు ఉన్నారు.