మహిళల కోసం ప్రత్యేకంగా ఉన్న “బైక్ పింక్” (Bike Pink) సేవను బుక్ చేసుకున్న ఒక మహిళకు, పురుష డ్రైవర్‌ను కేటాయించిన ఘటన ర్యాపిడో సంస్థపై తీవ్ర విమర్శలకు దారితీసింది.
షాలిని అనే మహిళా ప్రయాణికురాలు అదనపు రుసుము చెల్లించి మహిళల కోసం ఉద్దేశించిన ప్రత్యేక బైక్‌ను బుక్ చేసుకోగా, ఆమె వద్దకు ఒక పురుష డ్రైవర్ వచ్చాడు. ఆశ్చర్యపోయిన ఆమె దీనిపై నిలదీయగా.. తాను ఒక ‘గే’ (Gay) అని చెప్పి ఆ డ్రైవర్ తన చర్యను సమర్థించుకునే ప్రయత్నం చేశాడు.
అదనపు ఛార్జీలు వసూలు చేసినప్పటికీ మహిళల భద్రతను నిర్ధారించడంలో విఫలమవడమే కాకుండా, డ్రైవర్ల కేటాయింపును సరిగ్గా తనిఖీ చేయని ర్యాపిడో సంస్థ నిర్లక్ష్యాన్ని ఎండగడుతూ ఆ మహిళ ఇన్‌స్టాగ్రామ్‌లో ఒక వీడియోను పోస్ట్ చేసింది.
ఈ వీడియో సోషల్ మీడియాలో దావానలంలా వ్యాపించి వైరల్‌గా మారడంతో, స్పందించిన ర్యాపిడో సంస్థ బాధితురాలికి అధికారికంగా క్షమాపణలు చెప్పింది.
అంతేకాకుండా, “బైక్ పింక్” సేవ కేవలం మహిళా డ్రైవర్లకు మాత్రమే ఉద్దేశించినదని స్పష్టం చేసిన ర్యాపిడో.. అసలు పురుష డ్రైవర్‌కు ఈ రైడ్ ఎలా బుక్ అయిందన్న సాంకేతిక లోపంపై, అలాగే సదరు డ్రైవర్ ప్రవర్తనపై తీవ్రంగా అంతర్గత విచారణ జరుపుతున్నట్లు వెల్లడించింది.
Leave a Reply