కేరళకు చెందిన శరణ్య అనే యువతి, కర్ణాటకలోని కొడగు జిల్లా ‘తడియండమోల్’ కొండ ప్రాంతంలో ట్రెకింగ్‌కు వెళ్లి అదృశ్యం కావడం తీవ్ర కలకలం రేపుతోంది.
ఒక ప్రైవేట్ హోమ్‌స్టేలో బస చేసిన శరణ్య, నిన్న మధ్యాహ్నం మరో 9 మందితో కలిసి కొండలు ఎక్కడానికి వెళ్ళింది. ఆ సమయంలో అక్కడున్న కుక్కలతో ఆడుకుంటూ వెళ్లిన ఆమె, ఊహించని విధంగా తన బృందం నుండి విడిపోయి దారి తప్పింది.
“నేను దారి తప్పిపోయాను” అని హోమ్‌స్టే యజమానికి చివరిసారిగా ఫోన్ చేసిన శరణ్య మొబైల్, ఆ తర్వాత స్విచ్ ఆఫ్ అయిపోయింది. సుమారు 24 గంటలు గడిచినా ఆమె గురించి ఎలాంటి సమాచారం లభించలేదు. దీంతో పోలీసులు, అటవీ శాఖకు చెందిన 4 బృందాలు దట్టమైన అడవిలో గాలింపు చర్యలు చేపట్టాయి.
ఆ ప్రాంతంలో అడవి ఏనుగుల సంచారం ఎక్కువగా ఉండటం, పైగా భారీ వర్షం కురుస్తుండటంతో సహాయక చర్యలకు ఆటంకం కలుగుతోంది. డాగ్ స్క్వాడ్ సాయంతో 50 మందికి పైగా సిబ్బంది శరణ్య కోసం వెతుకుతున్నారు. ఆమె క్షేమంగా తిరిగి రావాలని ఆ ప్రాంతంలోని గిరిజనులు తమ కులదైవానికి ప్రత్యేక ప్రార్థనలు చేస్తున్నారు.