నోయిడాలోని సెక్టర్ 150లో జనవరి 17, శుక్రవారం అర్ధరాత్రి ఈ ఘోర ప్రమాదం జరిగింది. గుర్గావ్‌లోని ‘డన్ హంబీ ఇండియా’ కంపెనీలో పనిచేసే యువరాజ్ మెహతా (27) అనే టెక్కీ, పని ముగించుకుని ఇంటికి వస్తుండగా దట్టమైన పొగమంచు కారణంగా దారి కనిపించక కారుతో సహా నిర్మాణంలో ఉన్న ఒక లోతైన గుంతలో పడిపోయాడు.
ఏం జరిగింది?
- ప్రాణాల కోసం పోరాటం: యువరాజ్‌కు ఈత రాదు. కారు గుంతలో పడగానే ప్రాణాలను కాపాడుకోవడానికి కారు అద్దం నుండి బయటకు వచ్చి, కారు పైకప్పు (Roof) పై నిలబడ్డాడు. తన ఫోన్ ఫ్లాష్‌లైట్ ఆన్ చేసి, గట్టిగా అరుస్తూ తన తండ్రికి ఫోన్ చేశాడు.
- నిస్సహాయ స్థితిలో తండ్రి: యువరాజ్ నివసించేది అదే సెక్టర్ కావడంతో, ఫోన్ వచ్చిన కొద్ది నిమిషాల్లోనే తండ్రి రాజ్ మెహతా మరియు పోలీసులు అక్కడికి చేరుకున్నారు. కానీ దట్టమైన పొగమంచు వల్ల యువరాజ్ ఎక్కడున్నాడో కనిపించలేదు, కేవలం అతని ఆర్తనాదాలు మాత్రమే వినిపించాయి.
- పోలీసుల నిర్లక్ష్యం: యువరాజ్ స్నేహితుడు తెలిపిన వివరాల ప్రకారం.. మొదట అక్కడికి చేరుకున్న పోలీసులు తమకు ఈత రాదని చెప్పి మిన్నకుండిపోయారు. ఒక బాటసారి రక్షించడానికి నీటిలోకి దూకినా ఫలితం లేకపోయింది.
రెస్క్యూ ఆపరేషన్‌లో జాప్యం:
పోలీసులు అగ్నిమాపక దళం మరియు డిజాస్టర్ రెస్పాన్స్ ఫోర్స్ (SDRF) కి సమాచారం అందించారు. SDRF బృందం వచ్చినా వారి వద్ద సరైన సామాగ్రి లేకపోవడంతో సహాయక చర్యలు చేపట్టలేకపోయారు. చివరకు ఘజియాబాద్ నుండి NDRF బృందం వచ్చేసరికి మరో గంట సమయం పట్టింది.
రాత్రి 1:45 గంటల సమయంలో యువరాజ్ అరుపులు ఆగిపోయాయి. తెల్లవారుజామున 4:30 గంటలకు అతని మృతదేహాన్ని బయటకు తీశారు.