ముంబై: న్యూజిలాండ్‌పై అద్భుత విజయాన్ని నమోదు చేసి, టీమిండియా ఐసీసీ పురుషుల టీ20 ప్రపంచకప్ 2026 ట్రోఫీని కైవసం చేసుకుంది. భారత్ తన మూడవ టీ20 ప్రపంచకప్‌ను గెలుచుకోవడంపై పాకిస్థాన్ క్రికెటర్లతో సహా ప్రపంచ క్రికెట్ దిగ్గజాలంతా ‘మెన్ ఇన్ బ్లూ’ను అభినందిస్తున్నారు.
మహమ్మద్ హఫీజ్, సక్లైన్ ముస్తాక్, షాహిద్ అఫ్రిది, సనా మీర్ నుండి ఉమర్ గుల్ వరకు అందరూ భారత జట్టును ప్రశంసిస్తూనే, తమ సొంత పాకిస్థాన్ జట్టుపై విమర్శలు గుప్పించారు. అయితే, ఇద్దరు పాక్ క్రికెటర్ల స్పందనలు మాత్రం సోషల్ మీడియాలో వైరల్ అవుతున్నాయి. ఒకటి షోయబ్ అక్తర్ చేసిన వింత వ్యాఖ్య, రెండోది భారత్ గెలవదని ముందుగా అంచనా వేసి ఇప్పుడు తప్పు అని ఒప్పుకున్న మహమ్మద్ అమీర్ స్పందన.
షోయబ్ అక్తర్ ‘అమీర్ బచ్చే’ వ్యాఖ్యలు
భారత్ ట్రోఫీని అందుకుంటున్న సమయంలో షోయబ్ అక్తర్ స్పందిస్తూ.. “భారత్ ఎలా ప్రయత్నించిందంటే.. ఒక మొహల్లాలో (వీధిలో) ఒక ధనిక పిల్లాడు (అమీర్ బచ్చా) ఉండి, మిగిలిన పేద పిల్లలందరినీ పిలిచి.. ‘రండి క్రికెట్ ఆడదాం, కానీ నేనే గెలవాలి’ అని చెప్పినట్టు ఉంది. భారత్ కూడా మనతో అదే చేస్తోంది” అని వివాదాస్పద వ్యాఖ్యలు చేశాడు.
అతను ఇంకా మాట్లాడుతూ.. “ఎనిమిది జట్లలో నాలుగు మిగిలాయి, ఆ నాలుగింటిలో మూడింటిని పిలిచి ‘ఇది నా బ్యాట్’ అని చెప్పి, ఆఖరికి ‘నేను గెలిచాను’ అన్నట్టుగా ఉంది. అంటే క్రికెట్ యొక్క ప్రాథమిక ప్రమాణాలను (Criteria) కూడా నాశనం చేసేశారు” అని ఆరోపించాడు.
న్యూజిలాండ్ బౌలింగ్‌పై మహమ్మద్ అమీర్ విశ్లేషణ
ఫైనల్‌లో న్యూజిలాండ్ గెలుస్తుందని అంచనా వేసిన మహమ్మద్ అమీర్, తన అంచనా తప్పని భారత్ నిరూపించిందని అన్నాడు. “భారత్ విజయంలో న్యూజిలాండ్ బౌలింగ్ పాత్ర కూడా ఉంది. వారు వైడ్లు వేయడం, అవే బంతులు సిక్సర్లుగా వెళ్లడం చూస్తుంటే ఆశ్చర్యం వేసింది. బౌలర్లను నిరంతరం మార్చడం వింతగా ఉంది. న్యూజిలాండ్ ఇంత ఒత్తిడిలో ఉండటం నేను ఎప్పుడూ చూడలేదు” అని పేర్కొన్నాడు.
అయితే, గత మూడు మ్యాచ్‌లలో భారత్ అద్భుతంగా బ్యాటింగ్ చేసిందని అంగీకరిస్తూ.. “ఫాస్ట్ బౌలర్లు మాత్రమే టోర్నమెంట్లు గెలిపిస్తారనే అపోహను భారత్ బద్దలు కొట్టింది. వారి బ్యాటర్లు, మరియు బుమ్రా కలిసి ఈ వరల్డ్ కప్ గెలిపించారు” అని అమీర్ ప్రశంసించాడు.