జైపూర్: రాజస్థాన్లోని జైపూర్లో జరిగిన అను మీనా ఆత్మహత్య కేసులో నివ్వెరపరిచే నిజాలు వెలుగులోకి వచ్చాయి. అను మీనా ఆత్మహత్యకు ఆమె భర్త, PWD ఎగ్జిక్యూటివ్ ఇంజనీర్ (XEN) గౌతమ్ మీనా వేధింపులే కారణమని ఆమె కుటుంబ సభ్యులు ఆరోపిస్తున్నారు. ఏప్రిల్ 7న జరిగిన ఈ ఘటనపై మృతురాలి సోదరుడు నీరజ్ మీనా తాజాగా ముహానా పోలీస్ స్టేషన్లో కేసు నమోదు చేశారు.
ఏం జరిగింది?
- పనిమనిషితో అక్రమ సంబంధం: అక్టోబర్ 2025లో దీపావళి సమయంలో, తన ఇంట్లో పనిమనిషితో గౌతమ్ మీనాను అను మీనా అభ్యంతరకర స్థితిలో పట్టుకుంది. నిలదీసినందుకు అనును గౌతమ్ చితకబాదాడు. ఆ సమయంలో ఆమె ప్రాణ భయంతో పొరుగువారి వద్దకు పారిపోయి కుటుంబ సభ్యులకు సమాచారం అందించింది.
- రెచ్చిపోయిన అధికారి: భార్య తన బండారం బయటపెట్టిందన్న కోపంతో గౌతమ్ ఆమెపై వేధింపులు పెంచాడు. తన రక్షణ కోసం అను ఇంట్లో సీసీ కెమెరాలు ఏర్పాటు చేసినా, వాటికి చిక్కకుండా గౌతమ్ ఆమెను కొట్టేవాడు.
- పిల్లల సాక్ష్యం: గౌతమ్ ప్రతిరోజూ మద్యం తాగి భార్యాపిల్లలపై దాడి చేసేవాడని, పనిమనిషినే ‘అమ్మా’ అని పిలవాలని పిల్లలను ఒత్తిడి చేసేవాడని పిల్లలు వెల్లడించారు. మార్చి 13న అనును, పిల్లలను గదిలో బంధించి, గ్యాస్ సిలిండర్ ఆన్ చేసి చంపడానికి ప్రయత్నించాడని సోదరుడు తెలిపాడు.
- సీసీటీవీలో ఘోరాలు: అను చనిపోయిన తర్వాత ఆమె ఫోన్ను పరిశీలించగా, అందులో గౌతమ్ ఆమెను బూతులు తిడుతూ, టీవీని పగులగొడుతూ, ఆమెపై ఉమ్మివేస్తూ దాడి చేసిన దృశ్యాలు సీసీటీవీలో రికార్డయ్యాయి.
అత్యాశకు పరాకాష్ట: 2015లో వీరి వివాహం జరిగింది. అప్పట్లో రూ. 60 లక్షల కట్నంతో పాటు, పెళ్లి తర్వాత మరో రూ. 20 లక్షలు ఇచ్చినా, గౌతమ్ మీనా మరో వివాహం చేసుకుంటానని అనును వేధించేవాడు. ప్రస్తుతం గౌతమ్ మీనా పరారీలో ఉన్నాడు. అతడిని కఠినంగా శిక్షించాలని, తమకు మనవడు, మనవరాలి కస్టడీ కావాలని అను తల్లిదండ్రులు కోరుతున్నారు.
పోలీసులు కేసు నమోదు చేసి, నిందితుడి కోసం గాలింపు చర్యలు ముమ్మరం చేశారు.