ఉత్తరప్రదేశ్ రాష్ట్రం కాన్పూర్‌లో పైల్స్ (మూలవ్యాధి) సమస్యకు ఒక నకిలీ వైద్యుడి సలహా మేరకు చికిత్స తీసుకున్న ఒక వ్యక్తికి ఊహించని షాకింగ్ అనుభవం ఎదురైంది.
ఆ వ్యక్తి సుమారు కిలోన్నర (1.5 కిలోలు) బరువున్న ఒక గుండ్రటి రాయితో కొన్ని రోజులుగా ప్రతిరోజూ కాపడం పెడుతున్నట్లు సమాచారం. అయితే ఆ సమయంలో ఊహించని విధంగా ఆ రాయి అతడి శరీరంలోపల ఇరుక్కుపోయింది.
ఆ రాయిని బయటకు తీయడానికి ఆ వ్యక్తి స్వయంగా చాలాసార్లు ప్రయత్నించినా సాధ్యపడలేదు. దీంతో ఆసుపత్రికి వెళ్లాడు. మొదట తన సమస్యను మాత్రమే చెప్పిన అతను, దానికి గల కారణాన్ని చెప్పడానికి సంకోచించాడని వైద్యులు తెలిపారు. ఆ తర్వాత ఎక్స్‌రే తీసి చూడగా శరీరంలో రాయి ఇరుక్కున్నట్లు తేలింది. అప్పుడే, నకిలీ వైద్యుడి సలహా మేరకు రాయిని ఉపయోగించి పైల్స్‌కు చికిత్స చేసుకుంటున్నానని అతను వైద్యులకు అసలు విషయం చెప్పాడు.
డాక్టర్ ప్రశాంత్ కుమార్ మిశ్రా నేతృత్వంలోని వైద్యుల బృందం చాలా గంటల పాటు శస్త్రచికిత్స (ఆపరేషన్) చేసి ఆ రాయిని బయటకు తీశారు. రాయి లోపల ఇరుక్కుపోవడం వల్ల ఆ వ్యక్తి తీవ్రమైన నొప్పితో బాధపడ్డాడని, నడవడానికి కూడా తీవ్ర ఇబ్బంది పడ్డాడని వైద్యులు తెలిపారు.
కిలోన్నర బరువున్న రాయి శరీరంలో ఇరుక్కుపోవడం వల్ల అనేక ఇతర ఆరోగ్య సమస్యలు వచ్చే ప్రమాదం ఉందని డాక్టర్ ప్రశాంత్ కుమార్ తెలిపారు. సరైన సమయానికి ఆసుపత్రికి రాకపోయి ఉంటే ప్రాణాలకు కూడా ప్రమాదం వాటిల్లేదని ఆయన అన్నారు. ప్రస్తుతం ఆ వ్యక్తి ఆరోగ్య పరిస్థితి నిలకడగా ఉందని, రాయిని తొలగించిన తర్వాత అతన్ని సాధారణ హాస్పిటల్ వార్డుకు తరలించారని వైద్యులు తెలిపారు.