గురుగ్రామ్: హర్యానాలోని గురుగ్రామ్లో, పుట్టి కొన్ని రోజులైనా కాని పసికందుతో ఉన్న ఒక మహిళను అర్ధరాత్రి 1:30 గంటల వరకు పని చేయమని బలవంతం చేసిన ఘటన ఇంటర్నెట్లో తీవ్ర ఆగ్రహాన్ని కలిగిస్తోంది.
ఈ విషయంలో ఆ మహిళ భర్త సోషల్ మీడియాలో చేసిన పోస్ట్ వైరల్ కావడంతో తీవ్ర చర్చకు దారితీసింది. తన భార్య భారతదేశంలోనే అత్యంత కఠినమైన ‘చార్టర్డ్ అకౌంటెంట్’ (CA) పరీక్షలో ఉత్తీర్ణత సాధించిన అత్యంత ప్రతిభావంతురాలని, తమకు ఇప్పుడు పసికందు పుట్టినప్పటికీ, తన మేనేజర్ ఇచ్చిన పని ఒత్తిడి (Work Pressure) వల్ల ఆమె అర్థరాత్రి దాటిన తర్వాత కూడా పని చేయాల్సి వస్తోందని ఆ భర్త ఆవేదనతో పంచుకున్నారు.
ప్రతిరోజూ 12 నుండి 16 గంటల వరకు పని చేయాలని కార్పొరేట్ సంస్థలు ఆశించడం ఏ రకంగా సమంజసమని ఆయన ప్రశ్నించారు. అధిక పని భారం మరియు మేనేజర్ పెడుతున్న ఒత్తిడి కారణంగా తన భార్య శారీరకంగా, మానసికంగా పూర్తిగా అలసిపోయిందని కన్నీళ్లతో పేర్కొన్నారు.
అత్యంత తెలివైన ఒక మహిళ తన బిడ్డను చూసుకుంటూ, పనిని బ్యాలెన్స్ చేయలేక సతమతమవుతుంటే, దాన్ని అర్థం చేసుకోకుండా కార్పొరేట్ ప్రపంచం ఆమెను తప్పుబట్టడం ఎంతవరకు సమంజసం? అని ఆయన అడిగిన ప్రశ్న, కొత్తగా తల్లయిన మహిళలు నేటి పని వాతావరణంలో ఎదుర్కొంటున్న ఇబ్బందులపై నెటిజన్ల మధ్య తీవ్ర చర్చను రేకెత్తించింది.