వాషింగ్టన్: పసిఫిక్ మహాసముద్రంలో ‘ఎల్ నినో’ (El Niño) పరిస్థితులు ఏర్పడ్డాయని, సమీప భవిష్యత్తులోనే ఇవి చారిత్రక స్థాయికి తీవ్రరూపం దాల్చే అవకాశం ఉందని అమెరికాకు చెందిన ‘నేషనల్ ఓషియానిక్ అండ్ అట్మాస్ఫియరిక్ అడ్మినిస్ట్రేషన్’ (NOAA) గురువారం వెల్లడించింది.
ఈ శతాబ్దంలోనే అత్యంత బలమైన ఎల్ నినోగా ఇది మారవచ్చని శాస్త్రవేత్తలు అంచనా వేస్తున్నారు. అందుకే దీనికి ‘సూపర్ ఎల్ నినో’ అని పేరు పెట్టారు. ప్రపంచ వాతావరణ సమతుల్యతను దెబ్బతీసే ఈ పర్యావరణ మార్పును ఐక్యరాజ్యసమితి (UN) సెక్రటరీ జనరల్ ఆంటోనియో గుటెర్రస్ “తీవ్రమైన వాతావరణ హెచ్చరిక” (Urgent climate warning) గా అభివర్ణించారు.
అసలు ‘ఎల్ నినో’ అంటే ఏమిటి?
భూమధ్యరేఖకు సమీపంలోని పసిఫిక్ మహాసముద్ర ఉపరితల జలాలు అసాధారణంగా వేడెక్కడాన్నే ‘ఎల్ నినో’ అంటారు. ఈ మార్పుల వల్ల ప్రపంచవ్యాప్తంగా వాతావరణం దెబ్బతినడమే కాకుండా, రుతుపవనాల గమనం నెమ్మదించి వర్షపాతం గణనీయంగా తగ్గుతుంది.
NOAA విడుదల చేసిన తాజా నివేదిక ప్రకారం.. ఈ ఎల్ నినో ప్రభావం 2026-27 శీతాకాలంలో ఉత్తరార్ధ గోళం (Northern Hemisphere) పై తీవ్రంగా ఉండనుంది. దీనివల్ల భారత్ సహా ఉష్ణమండల దేశాలపై (Tropical countries) తీవ్ర ప్రభావం పడే అవకాశం ఉంది. ఈ వాతావరణ మార్పుల కారణంగా రాబోయే 2027 సంవత్సరం చరిత్రలోనే అత్యంత గరిష్ట ఉష్ణోగ్రతలు నమోదయ్యే ప్రమాదం ఉందని, తద్వారా ప్రపంచవ్యాప్తంగా వాతావరణం, ఆహార సరఫరా, ఆర్థిక వ్యవస్థలు తీవ్రంగా దెబ్బతింటాయని బీబీసీ (BBC) పేర్కొంది. 2026 ప్రారంభంలో చల్లటి వాతావరణాన్ని ఇచ్చే ‘లా నినా’ (La Niña) ప్రభావం ముగిసిన తర్వాత ఈ ఎల్ నినో ప్రక్రియ మొదలైంది.
భయపెడుతున్న ‘సూపర్ ఎల్ నినో’
ఈ ఎల్ నినో అధికారికంగా పూర్తిగా రూపాంతరం చెందకముందే, దీని తీవ్రతను బట్టి శాస్త్రవేత్తలు దీనికి “సూపర్ ఎల్ నినో”, “గాడ్జిల్లా ఎల్ నినో” వంటి పేర్లు పెట్టారని ది గార్డియన్ (The Guardian) పత్రిక నివేదించింది.
గత కొన్ని వారాలుగా పసిఫిక్లో కనిపిస్తున్న బలమైన సంకేతాల ప్రకారం.. ఈ ఎల్ నినో అంచనా వేసిన సమయం కంటే ఒకట్రెండు నెలలు ముందుగానే (శరదృతువు లేదా శీతాకాలం కంటే ముందే) గరిష్ట స్థాయికి చేరుకోనుంది. ప్రపంచ వాతావరణ సంస్థ (WMO) ప్రకారం.. పసిఫిక్ మహాసముద్రంలో నమోదవుతున్న అసాధారణ వేడి ఉష్ణోగ్రతలే ఇందుకు కారణం. దీని ప్రభావం జూన్ నుండి ఆగస్టు మధ్యే కాకుండా నవంబర్ వరకు కొనసాగే అవకాశం ఉందని వాతావరణ నిపుణులు చెబుతున్నారు. దీనివల్ల ప్రపంచంలోని వివిధ ప్రాంతాలలో విపరీతమైన ఎండలు, వడగాల్పులు, వర్షభావం, కరవు పరిస్థితులు ఏర్పడి, ఆహార, నీటి సరఫరా వ్యవస్థలపై తీవ్ర ఒత్తిడి పడనుంది.
‘ప్రపంచమంతటా ఒకేలా ఉండదు’
అయితే, ప్రతి ఎల్ నినో ప్రభావం ప్రపంచవ్యాప్తంగా ఒకేలా ఉండదని NOAA నేషనల్ వెదర్ సర్వీస్ (NWS) డైరెక్టర్ కెన్ గ్రాహం ఒక ప్రకటనలో తెలిపారు. “ప్రతి ఎల్ నినో ప్రత్యేకమైనది. వాతావరణంపై దాని ముద్ర వేర్వేరుగా ఉంటుంది” అని ఆయన పేర్కొన్నారు. అధునాతన పర్యవేక్షణ వ్యవస్థల వల్ల వాతావరణ మార్పులను ముందే గుర్తించి, ప్రజలను, భాగస్వామ్య సంస్థలను అప్రమత్తం చేయడానికి వీలవుతుందని ఆయన వివరించారు.
వివిధ దేశాలపై ఎలాంటి ప్రభావం ఉంటుంది?
- అమెరికా, పసిఫిక్ ప్రాంతాలు: అట్లాంటిక్ మహాసముద్రంలో వచ్చే హరికేన్ల (తుఫానుల) తీవ్రతను ఎల్ నినో తగ్గిస్తుంది. దీనివల్ల అమెరికా తూర్పు తీరానికి ఉపశమనం లభిస్తుంది. కానీ పసిఫిక్ ప్రాంతంలో మాత్రం హరికేన్ల ఉధృతి పెరుగుతుంది. హవాయి వంటి దీవులు ప్రమాదంలో పడే అవకాశం ఉంది. అమెరికా దక్షిణ ప్రాంతంలో వరదలు, వాయవ్య ప్రాంతంలో పొడి వాతావరణం ఏర్పడవచ్చు. కాలిఫోర్నియాలో శీతాకాలపు వర్షాలు ఎక్కువగా పడొచ్చు.
- దక్షిణ అమెరికా & ఆఫ్రికా: పశ్చిమ దక్షిణ అమెరికాలోని కొన్ని ప్రాంతాల్లో భారీ వర్షాలు, వరదలు రావచ్చు. తూర్పు ఆఫ్రికా, మధ్య ఆసియా, పెరూ, ఈక్వెడార్ దేశాల్లో వరద ముప్పు పొంచి ఉంది. ఈశాన్య ఆఫ్రికాలో మాత్రం ఒకవైపు తీవ్రమైన కరవు, మరోవైపు ఆకస్మిక భారీ వర్షాలు వంటి వింత వాతావరణ పరిస్థితులు తలెత్తే ప్రమాదం ఉంది.
- ఆహార సంక్షోభం: ఎల్ నినో ప్రభావం వల్ల ప్రపంచవ్యాప్తంగా ఆహార సరఫరా వ్యవస్థ దెబ్బతినే ప్రమాదం ఉందని నిపుణులు హెచ్చరిస్తున్నారు. ముఖ్యంగా ఎల్ నినో మరియు కరవు పరిస్థితులను తట్టుకోలేని మొక్కజొన్న, వరి వంటి పంటల దిగుబడి భారతదేశం, బ్రెజిల్, ఇండోనేషియా, వియత్నాం, దక్షిణాఫ్రికా దేశాలలో గణనీయంగా తగ్గే అవకాశం ఉంది.
- బ్రిటన్ & ఆస్ట్రేలియా: బ్రిటన్లో శరదృతువు, శీతాకాలం ప్రారంభంలో తీవ్రమైన గాలులు, వర్షాలు కురిసే అవకాశం ఉండగా.. ఆస్ట్రేలియా దేశాన్ని మాత్రం తీవ్రమైన కరవు, అడవి మంటలు (Wildfires), వడగాల్పులు భయపెడుతున్నాయి.
భారతదేశంపై ఎల్ నినో ప్రభావం
భారతదేశంలో ఈ ఎల్ నినో పరిస్థితుల వల్ల తీవ్రమైన వడగాల్పులు (Heatwaves) వీచే ప్రమాదం ఉంది. గతంలో ఇటువంటి వడగాల్పుల కారణంగా దేశవ్యాప్తంగా వందలాది మంది ప్రాణాలు కోల్పోయిన సంగతి తెలిసిందే.
గత చరిత్రను పరిశీలిస్తే.. భారతదేశంలో సంభవించిన అనేక తీవ్రమైన కరవు సంవత్సరాలు, బలమైన ఎల్ నినో కాలంతో ఏకీభవించాయని పరిశోధకులు చెబుతున్నారు. అయితే ప్రతిసారీ ఇలాగే జరుగుతుందని చెప్పలేమని, భారత రుతుపవనాలపై కేవలం ఎల్ నినో మాత్రమే కాకుండా ఇతర వాతావరణ శక్తులు కూడా ప్రభావం చూపుతాయని స్పష్టం చేశారు. గతంలో 2015-16 లో వచ్చిన ‘సూపర్ ఎల్ నినో’ సమయంలో భారతదేశంలో సాధారణం కంటే కేవలం 86 శాతం మాత్రమే వర్షపాతం నమోదైంది.
Leave a Reply