భారత అణ్వాయుధ సంపత్తికి సంబంధించి వెలువడిన సరికొత్త అంచనా అంతర్జాతీయ స్థాయిలో విశేష దృష్టిని ఆకర్షించింది. అమెరికాకు చెందిన పరిశోధక సంస్థ ఫెడరేషన్ ఆఫ్ అమెరికన్ సైంటిస్ట్స్ (FAS) ప్రచురించిన తాజా నివేదిక ప్రకారం, ప్రస్తుతం భారత్ వద్ద సుమారు 190 అణ్వాయుధాలు ఉండవచ్చని అంచనా వేసింది.
వీటిలో 160కి పైగా వార్‌హెడ్‌లు ఇప్పటికే కార్యకలాపాల్లో ఉన్న లాంచర్లు, యుద్ధ విమానాలకు అనుసంధానించి మోహరించేందుకు సిద్ధంగా ఉన్నాయని, సరికొత్త క్షిపణి ప్రాజెక్టుల కోసం అదనంగా మరో 30 అణ్వాయుధాలు తయారీ దశలో ఉన్నాయని ఆ నివేదిక పేర్కొంది.
అయితే ఈ సంఖ్యను భారత ప్రభుత్వం అధికారికంగా ధ్రువీకరించలేదు. దేశ రక్షణకు సంబంధించిన అణ్వాయుధ కార్యక్రమాల వివరాలను భారత్ అత్యంత రహస్యంగా ఉంచుతుంది. అందువల్ల ఎఫ్‌ఏఎస్ (FAS) వంటి పరిశోధనా సంస్థలు ఉపగ్రహ చిత్రాలు, బహిరంగ సమాచారం, రక్షణ రంగ నివేదికల ఆధారంగానే ఈ అంచనాను రూపొందించాయి. కాబట్టి ఈ 190 అనేది కేవలం ఒక పరిశీలనాత్మక అంచనా మాత్రమే తప్ప, భారత ప్రభుత్వ అధికారిక గణాంకం కాదనే విషయాన్ని గమనించాలి.
అలాగే భారత్ వద్ద సుమారు 730 కిలోల వెపన్-గ్రేడ్ ప్లూటోనియం నిల్వలు ఉండవచ్చని ఈ అధ్యయనం వెల్లడించింది. ప్రస్తుతం అందుబాటులో ఉన్న ఈ నిల్వలతో సుమారు 140 నుంచి 225 వరకు అణ్వాయుధాలను తయారు చేసుకునే సామర్థ్యం ఉందని విశ్లేషించింది. అయితే అందుబాటులో ఉన్న ముడి ప్లూటోనియం మొత్తం ఆయుధాలుగా మార్చబడిందని భావించలేమని పరిశోధకులు స్పష్టం చేశారు.
మరోవైపు అత్యాధునిక బాలిస్టిక్ క్షిపణులు, ఇతర సరికొత్త ప్రయోగ వ్యవస్థల రూపకల్పన వేగవంతం అవుతుండటంతో రానున్న రోజుల్లో భారత అణ్వాయుధాల సంఖ్య మరింత పెరిగే అవకాశం ఉందని ఎఫ్‌ఏఎస్ పేర్కొంది. ప్రస్తుత అంచనాల ప్రకారం భారత్ వద్ద ఉన్నట్లు చెబుతున్న 190 వార్‌హెడ్‌ల సంఖ్య, పాకిస్తాన్ వద్ద ఉన్న 170 అణ్వాయుధాల కంటే ఎక్కువ. అదే సమయంలో బ్రిటన్ వద్ద సుమారు 225 వార్‌హెడ్‌లు ఉన్నట్లు అంచనాలు ఉన్నందున, భారత్ ఆ మైలురాయికి అత్యంత చేరువవుతోందని తెలిపింది.