ఇస్లామాబాద్/వాషింగ్టన్:
మధ్యప్రాచ్యంలో శాంతిని నెలకొల్పేందుకు పాకిస్థాన్ చేసిన ప్రయత్నాలు బూడిదలో పోసిన పన్నీరయ్యాయి. ఇస్లామాబాద్ వేదికగా 30 గంటల పాటు సాగిన సుదీర్ఘ దౌత్య పోరాటం చివరకు చేదు ఫలితాన్నే మిగిల్చింది. అమెరికా, ఇరాన్ మధ్య అగాధం మరింత పెరగడంతో ఏప్రిల్ 22 డెడ్లైన్కు ముందే యుద్ధ భయం ప్రపంచాన్ని వణికిస్తోంది.
30 గంటల హైడ్రామా.. కొలిక్కి రాని చర్చలు
పాక్ రాజధాని ఇస్లామాబాద్ వేదికగా అమెరికా ఉపాధ్యక్షుడు జేడీ వెన్స్, ఇరాన్ పార్లమెంట్ స్పీకర్ మహమ్మద్ బాకీర్ గాలిబాఫ్ మధ్య చారిత్రాత్మక చర్చలు జరిగాయి. విరామాలతో కలిపి సుమారు 30 గంటల పాటు సాగిన ఈ చర్చల్లో ఇరు దేశాలు తమ పట్టు వీడలేదు. పాక్ ఆర్మీ చీఫ్ ఫీల్డ్ మార్షల్ ఆసిమ్ మునీర్ స్వయంగా రంగంలోకి దిగి, టెహ్రాన్కు వెళ్లి ఇరాన్ విదేశాంగ మంత్రి అబ్బాస్ అరాగ్చీతో చర్చలు జరిపినప్పటికీ ఫలితం శూన్యం. రెండో రౌండ్ చర్చలకు కనీసం ముహూర్తం కూడా ఖరారు కాలేదు.
అడ్డంకిగా మారిన అణు కార్యక్రమం
ఈ వైఫల్యానికి ప్రధాన కారణం ఇరాన్ అణు కార్యక్రమమే అని తెలుస్తోంది. ఇరాన్ తన అణు ప్రయత్నాలను తక్షణమే విరమించుకోవాలని అమెరికా మొండిగా డిమాండ్ చేస్తుండగా.. అమెరికాను నమ్మలేమని, వారి డిమాండ్లు అతిగా ఉన్నాయని ఇరాన్ తేల్చిచెప్పింది. పరస్పర విశ్వాస రాహిత్యంతో ఈ చర్చలు అర్ధాంతరంగా ముగిశాయి.
హోర్ముజ్ జలసంధి దిగ్బంధం: 14 నౌకల నిలిపివేత
చర్చలు విఫలం కావడంతో అమెరికా తన ప్రతాపాన్ని చూపడం మొదలుపెట్టింది. వ్యూహాత్మకంగా అత్యంత కీలకమైన హోర్ముజ్ జలసంధిని అమెరికా దళాలు తమ ఆధీనంలోకి తీసుకున్నాయి. గడిచిన 72 గంటల్లో ఈ మార్గం గుండా వెళ్తున్న 14 భారీ నౌకలను అమెరికా బలవంతంగా వెనక్కి పంపేశాయి. అవసరమైనంత కాలం ఈ సముద్ర దిగ్బంధం కొనసాగుతుందని అమెరికా రక్షణ మంత్రి హెచ్చరించడం ఉత్కంఠను రేపుతోంది.
ఇజ్రాయెల్ – లెబనాన్ మధ్య 10 రోజుల కాల్పుల విరమణ
ఒకవైపు ఉద్రిక్తతలు కొనసాగుతుండగానే, అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. ఇజ్రాయెల్ మరియు లెబనాన్ మధ్య 10 రోజుల పాటు కాల్పుల విరమణకు అంగీకారం కుదిరినట్లు ప్రకటించారు. భారత కాలమానం ప్రకారం ఏప్రిల్ 17 అర్ధరాత్రి 2:30 గంటల నుండి ఇది అమల్లోకి రానుంది. గత 34 ఏళ్లలో ఇరు దేశాల మధ్య శాంతి కోసం జరిగిన అతిపెద్ద ప్రయత్నం ఇదే కావడం విశేషం.
శాంతి ప్రకటన వేళ.. మిసైళ్ల వర్షం
కాల్పుల విరమణ ప్రకటన వెలువడినప్పటికీ, క్షేత్రస్థాయిలో పరిస్థితి భీతావహంగా ఉంది. దక్షిణ లెబనాన్లోని హిజ్బుల్లా స్థావరాలే లక్ష్యంగా ఇజ్రాయెల్ సైన్యం 200 చోట్ల విరుచుకుపడింది. ఈ దాడుల్లో 9 మంది మరణించగా, ఆరుగురు గాయపడ్డారు. దీనికి ప్రతిగా హిజ్బుల్లా కూడా ఉత్తర ఇజ్రాయెల్పై డ్రోన్లు, రాకెట్లతో విరుచుకుపడుతోంది.
ఏప్రిల్ 22: నిర్ణయాత్మక గడియ
ఫిబ్రవరి 28, 2026న ప్రారంభమైన ఈ భీకర పోరులో ఏప్రిల్ 8న ఒక చిన్న విరామం లభించింది. ప్రస్తుత కాల్పుల విరమణ గడువు ఏప్రిల్ 22తో ముగియనుంది. ఈ లోగా ఏదైనా గట్టి ఒప్పందం కుదరకపోతే, మధ్యప్రాచ్యం మరో మహా యుద్ధానికి సాక్ష్యంగా మారక తప్పదు.