కన్నౌజ్: ఉత్తరప్రదేశ్లోని కన్నౌజ్ జిల్లా సౌరిక్ ప్రాంతంలో ఒక ప్రభుత్వ ప్రాథమిక పాఠశాల నడుస్తోంది. పాఠశాలలో ప్రేమను, క్రమశిక్షణను నేర్పించాల్సిన ఉపాధ్యాయులే, ఆ పవిత్రమైన తరగతి గదిని తమ అంతరంగిక పనులకు వేదికగా మార్చుకున్న ఘోరం, ప్రస్తుతం సోషల్ మీడియాలో దావానలంలా వ్యాపించింది.
సడన్గా సోషల్ మీడియాలో లీకైన ఆ చిన్న వీడియో క్లిప్, మొత్తం విద్యాశాఖనే వణికించింది. క్లాస్రూమ్ మూలలో ఒక పురుష ఉపాధ్యాయుడు, మహిళా ఉపాధ్యాయురాలు తమ పరిధులు దాటి సన్నిహితంగా ఉన్న దృశ్యాలు ఆ వీడియోలో రికార్డయ్యాయి. ఎంతో మంది పేద తల్లిదండ్రులు తమ పిల్లల భవిష్యత్తు బాగుంటుందనే నమ్మకంతో పంపే ఆ పాఠశాల, కొందరి క్షణిక బలహీనత వల్ల తన గౌరవాన్ని కోల్పోవడాన్ని ఎవరూ సహించలేకపోతున్నారు. ఈ వీడియో బయటకు వచ్చిన కొన్ని గంటల్లోనే, ఆ ప్రాంతమంతా తీవ్ర ఆగ్రహావేశాలు వ్యక్తమయ్యాయి.
అయితే, ఈ వైరల్ వీడియో వెనుక కేవలం నైతిక విలువల లోపమే కాకుండా… ఒక మహిళ ఆవేదన, నమ్మకద్రోహం కూడా ఉన్నట్లు తెలుస్తోంది. విచారణలో తేలిన వివరాల ప్రకారం, ఈ వీడియోను సోషల్ మీడియాలో షేర్ చేసింది మరెవరో కాదు, ఆ పురుష ఉపాధ్యాయుడి సొంత భార్య అని సమాచారం. గత నాలుగేళ్లుగా ఆ దంపతుల మధ్య తీవ్ర కుటుంబ కలహాలు నడుస్తున్నాయి. వారి వివాదాలు కోర్టు మెట్లెక్కి, ఫ్యామిలీ కోర్టు తీర్పు కోసం వేచి చూస్తున్నాయి.
నమ్మకద్రోహంతో తీవ్ర మనస్తాపానికి గురైన ఆ భార్య, తన భర్త అసలు స్వరూపాన్ని బయటపెట్టడానికి, గతంలో పాఠశాల ప్రాంగణంలో అతను చేసిన ఈ తప్పుడు పనికి సంబంధించిన రహస్య రికార్డింగ్ను ఇప్పుడు బహిరంగంగా షేర్ చేసినట్లు చెబుతున్నారు. ఈ వీడియో ఇప్పుడు తీసింది కాదని, చాలా కాలం క్రితం నాటి పాత రికార్డింగ్ అని కొన్ని వర్గాలు చెబుతున్నాయి. అయితే, అది ఎప్పుడు తీశారు? ఎవరు రహస్యంగా రికార్డ్ చేశారు? అనే ప్రశ్నల ఇంకా సస్పెన్స్గానే ఉన్నాయి. కాలం గడిచినప్పటికీ, తప్పు జరిగిన స్థలం పాఠశాల కాబట్టి, దీని తీవ్రతను తక్కువగా అంచనా వేయలేము.
ఈ వార్త వైరల్ అయిన వెంటనే పాఠశాల యాజమాన్యం అప్రమత్తమైంది. పాఠశాల ప్రధానోపాధ్యాయుడు (హెడ్మాస్టర్), సదరు ఉపాధ్యాయుడికి వివరణ కోరుతూ తక్షణమే నోటీసు జారీ చేశారు. ఈ వ్యవహారాన్ని జిల్లా ఉన్నత విద్యాశాఖ దృష్టికి తీసుకెళ్లారు. అధికారులు స్పందిస్తూ, ‘విచారణ కమిటీని ఏర్పాటు చేశాం. ఉపాధ్యాయుడి వివరణ, విచారణ నివేదిక ఆధారంగా కఠినమైన శాఖాపరమైన చర్యలు తీసుకుంటాం’ అని స్పష్టం చేశారు.