వాషింగ్టన్: భూమి యొక్క మాంటిల్ (Mantel) లోపల, పైపొరకి చాలా దిగువన గణనీయమైన మొత్తంలో నీరు ఉండే అవకాశం ఉందని బ్రూక్ హావన్ నేషనల్ లాబొరేటరీ ఆధారాలను సేకరించింది.
భూమి ఉపరితలం నుండి సుమారు 700 కిలోమీటర్ల లోతులో ఈ జల నిధి ఉంది. అయితే, ఇది ద్రవ రూపంలో లేదు, ఖనిజాల మధ్య చిక్కుకుపోయి ఉందని శాస్త్రవేత్తలు చెబుతున్నారు. భూ ఉపరితలంపై ఉన్న అన్ని సముద్రాల కంటే ఇది పెద్దదని అంచనా. ఉపరితల జలవనరులకు భిన్నంగా ఉన్నప్పటికీ, దీనిని శాస్త్రవేత్తలు ‘సముద్రం’ అని పిలుస్తున్నారు. నివేదికల ప్రకారం, ఇది ‘రింగ్‌వుడైట్’ (Ringwoodite) అనే అధిక పీడనం కలిగిన ఖనిజంలో నిక్షిప్తమై ఉంది.
ఖనిజాల లోపల నీరు: నీరు ప్రవహించే ద్రవంగా కాకుండా, ఖనిజాల స్పటిక నిర్మాణంలో రసాయనిక బంధంగా కలిసి ఉంది. రింగ్‌వుడైట్ ఖనిజం పెద్ద మొత్తంలో నీటిని నిల్వ చేయగలదని ప్రయోగశాల పరీక్షలు ధృవీకరించాయి. భూమి ఏర్పడినప్పటి నుండి నీరు గ్రహంలో భాగమే అనే సిద్ధాంతానికి ఈ ఆవిష్కరణ మద్దతు ఇస్తుంది. గతంలో తోకచుక్కల వంటి బాహ్య వనరుల నుండి భూమికి నీరు వచ్చిందనే వాదన ఉండేది, కానీ ఈ కొత్త పరిశోధన ప్రకారం భూమి పుట్టినప్పటి నుండే నీరు ఇక్కడే ఉందని అర్థమవుతోంది.
ఉపరితలానికి నీరు ఎలా వచ్చింది? అగ్నిపర్వతాల చర్యల వల్ల లోపల ఉన్న నీరు కాలక్రమేణా ఉపరితలానికి వచ్చి ఉండవచ్చు. సముద్రాల్లో నీటి మట్టం కాలక్రమేణా స్థిరంగా ఉండటాన్ని ఈ సిద్ధాంతం సమర్థిస్తోంది. ప్రస్తుతం మన దగ్గర ఉన్న సాంకేతికతతో 700 కిలోమీటర్ల లోతుకు వెళ్లడం అసాధ్యం. అందువల్ల, శాస్త్రవేత్తలు పరోక్ష పద్ధతుల ద్వారా దీనిని గుర్తించారు. కొన్ని ప్రాంతాలలో భూకంప తరంగాలు (Seismic Waves) నెమ్మదిగా కదలడాన్ని గమనించారు, ఇది ఖనిజాలలో నీరు ఉన్నట్లు సూచిస్తుంది. విస్తృతమైన సీస్మోమీటర్ నెట్‌వర్క్‌ల ద్వారా సేకరించిన సమాచారం మాంటిల్‌లో నీరు ఉందని ప్రాథమికంగా నిర్ధారించింది.