ఉదయం లేవగానే మన ఇంట్లోకి మొదట వచ్చేది పాల ప్యాకెట్. టీ, కాఫీ లేదా పిల్లల ఆరోగ్యం కోసం ఇచ్చే పాలు.. మన ఆహారంలో అత్యంత ముఖ్యమైన భాగం. పాలు శరీరానికి మంచివని డాక్టర్లు కూడా సలహా ఇస్తారు. కానీ, గత కొన్ని రోజులుగా ఈ పాలే దేశవ్యాప్తంగా కలకలం రేపుతున్నాయి. సోషల్ మీడియా నుండి పార్లమెంట్ వరకు ఇప్పుడు ఒకటే చర్చ.. మనం తాగే పాలు నిజంగా సురక్షితమేనా?
ఒక వైరల్ వీడియోతో మొదలైన ఈ వివాదం ఇప్పుడు పెద్ద బ్రాండ్ల విశ్వసనీయతను ప్రశ్నార్థకం చేస్తోంది. అసలు ఈ గొడవ ఏమిటి? సామాన్యులు భయపడకుండా ఎలాంటి జాగ్రత్తలు తీసుకోవాలో ఇక్కడ తెలుసుకుందాం.
వివాదానికి కారణం ఏమిటి? CNBC నివేదిక ప్రకారం, ‘Trustified’ అనే స్వతంత్ర టెస్టింగ్ ప్లాట్‌ఫారమ్ చేసిన వాదనల వల్ల ఈ వివాదం రాజుకుంది. వారి నివేదిక ప్రకారం, అమూల్ (Amul Taaza & Gold) పాలల్లో ‘కోలిఫాం బ్యాక్టీరియా’ (Coliform Bacteria) పరిమాణం FSSAI నిర్ణయించిన పరిమితి కంటే ఏకంగా 98 రెట్లు ఎక్కువగా ఉన్నట్లు పేర్కొన్నారు. మదర్ డెయిరీ, కంట్రీ డిలైట్ వంటి బ్రాండ్ల పాలల్లో కూడా పరిశుభ్రత ప్రమాణాలు పాటించడం లేదని ఆరోపించారు.
అయితే, అమూల్ ఈ వాదనలను పూర్తిగా తోసిపుచ్చింది. తమ ఉత్పత్తులన్నీ భద్రతా ప్రమాణాలకు అనుగుణంగానే ఉన్నాయని స్పష్టం చేసింది. ఒకవేళ ఏవైనా లోపాలు ఉంటే, అవి రవాణా సమయంలో ‘కోల్డ్ చైన్’ (Cold Chain) సరిగ్గా నిర్వహించకపోవడం వల్ల జరిగి ఉండవచ్చు కానీ, తయారీలో కాదని కంపెనీ పేర్కొంది.
కేవలం ల్యాబ్ రిపోర్టులే కాదు, గత నెలలో గుజరాత్, రాజస్థాన్, మధ్యప్రదేశ్ వంటి రాష్ట్రాల్లో కల్తీ పాల కేంద్రాలపై పోలీసులు దాడులు చేశారు. గుజరాత్‌లో జరిగిన ఒక దాడిలో 300 లీటర్ల స్వచ్ఛమైన పాలల్లో నీరు, మిల్క్ పౌడర్, కాస్టిక్ సోడా, నూనె, డిటర్జెంట్ మరియు యూరియా కలిపి ఏకంగా 1800 లీటర్ల నకిలీ పాలను తయారు చేస్తున్నట్లు బయటపడింది.
వినియోగదారులు ఏం చేయాలి?
- పాలను మరిగించండి: ప్యాకెట్ పాలను తెచ్చిన వెంటనే మరిగించండి. కేవలం పాశ్చరైజేషన్ (Pasteurisation) పైనే ఆధారపడకండి.
- టెట్రా ప్యాక్: చిన్న పిల్లలు లేదా వృద్ధుల కోసం UHT లేదా టెట్రా ప్యాక్ పాలు కొంత వరకు సురక్షితమని భావిస్తున్నారు.
- ఇంట్లోనే పరీక్షలు:
- స్టార్చ్: మరిగించిన పాలల్లో కొన్ని చుక్కల అయోడిన్ వేయండి; పాలు నీలం రంగులోకి మారితే కల్తీ జరిగినట్లు అర్థం.
- డిటర్జెంట్: పాలు మరియు నీటిని కలిపి ఒక బాటిల్‌లో వేసి గట్టిగా ఊపండి; ఎక్కువ నురుగు వచ్చి అది చాలా సేపు ఉంటే డిటర్జెంట్ కలిసినట్లు అనుమానించాలి.
- యూరియా: ఎర్ర లిట్మస్ పేపర్‌ను పాలు మరియు కందిపప్పు పొడి మిశ్రమంలో ముంచినప్పుడు అది నీలం రంగులోకి మారితే యూరియా ఉన్నట్లు అర్థం.