ఢిల్లీ మెట్రోలో ఒక ప్రయాణికుడికి చెందిన ₹20 లక్షల విలువైన నగలు ఉన్న బ్యాగ్ మాయమైంది. స్కానింగ్ మెషిన్ దగ్గర బ్యాగ్ పెట్టిన తర్వాత అది కనిపించకపోవడంతో బాధితుడు అధికారులను ఆశ్రయించారు. దీనిపై విచారణ చేపట్టిన మెట్రో పోలీసులకు సీసీటీవీలో ఒక గులాబీ రంగు జాకెట్ ధరించిన మహిళ ఆ బ్యాగ్‌ను తీసుకెళ్లినట్లు కనిపించింది.
పోలీసుల సాంకేతిక వేట
మెట్రో డీసీపీ కుశాల్ పాల్ సింగ్ ఆదేశాల మేరకు ఏర్పడిన ప్రత్యేక బృందం చాందినీ చౌక్ నుండి నిందితురాలు ఎక్కడికి వెళ్లిందో సీసీటీవీల ద్వారా ట్రాక్ చేసింది. ఆమె మొదట మిలీనియం సిటీ సెంటర్ వైపు వెళ్లే రైలు ఎక్కి, ఆపై బారాఖంబా స్టేషన్‌లో దిగి నోయిడా వైపు వెళ్లే రైలు పట్టుకుంది. చివరకు నోయిడా సెంటర్-52 స్టేషన్‌లో దిగి బయటకు వెళ్లిపోయింది.
‘రాధికా కలెక్షన్’ ఇచ్చిన క్లూ
సిసిటివి ఫుటేజీలో ఆమె ముఖం స్పష్టంగా లేదు, కానీ ఆమె చేతిలో ‘రాధికా కలెక్షన్’ (Radhika Collection) అని రాసి ఉన్న ఒక షాపింగ్ బ్యాగ్ ఉంది. పోలీసులు వెంటనే చాందినీ చౌక్ మార్కెట్‌కు వెళ్లి ఆ పేరుతో ఉన్న దుకాణాన్ని వెతికారు. ఆ దుకాణదారుడిని విచారించగా, ఆ మహిళకు సంబంధించిన వివరాలు లభించాయి. దాని ఆధారంగా పోలీసులు ఆమె ఇంటికి చేరుకుని అరెస్ట్ చేశారు.
వింత సమాధానం చెప్పిన నిందితురాలు
పోలీసుల విచారణలో ఆ మహిళ వింత వాదన వినిపించింది. తన తమ్ముడి పెళ్లి కోసం షాపింగ్‌కు వచ్చానని, హడావిడిలో పొరపాటున ఆ బ్యాగ్ తనదే అనుకుని తీసుకెళ్లానని చెప్పింది. అయితే, ఇంటికి వెళ్ళాక అందులో లక్షల విలువైన నగలు ఉన్నాయని తెలిసినా పోలీసులకు ఎందుకు సమాచారం ఇవ్వలేదని ప్రశ్నించగా ఆమె మౌనంగా ఉండిపోయింది. దీంతో ఆమె ఉద్దేశపూర్వకంగానే దొంగతనం చేసిందని పోలీసులు నిర్ధారించారు.
పోలీసుల విజయం
పోలీసులు ఆమె వద్ద నుండి ₹20 లక్షల విలువైన నగలను పూర్తిగా రికవరీ చేశారు. నిందితురాలికి ఎలాంటి నేర చరిత్ర లేకపోయినా, ఈ ఒక్క తప్పు ఆమెను జైలు పాలు చేసింది. లగేజీ స్కానింగ్ సమయంలో ప్రయాణికులు జాగ్రత్తగా ఉండాలని, పొరపాటున ఇతరుల సామాను వస్తే వెంటనే అధికారులకు అప్పగించాలని పోలీసులు సూచిస్తున్నారు.