చిన్న పిల్లలను ముస్తాబు చేసేటప్పుడు తల్లులు తప్పనిసరిగా చేసే పని కళ్లకు కాటుక పెట్టడం. ముఖ్యంగా అప్పుడే పుట్టిన శిశువులకు కాటుక పెట్టడం అనేది ప్రతి ఇంట్లో కనిపించే ఆచారం.
పూర్వం ఇది సాధారణ విషయమే అయినప్పటికీ, నేడు మనం దీని విషయంలో జాగ్రత్తగా ఉండాలి. ఎందుకంటే ఇది ఆరోగ్యంపై తీవ్రమైన ముప్పును కలిగిస్తోంది. కాటుక పెట్టిన తర్వాత పిల్లల కళ్లలో దురద, వాపు, ఇన్‌ఫెక్షన్లు వచ్చిన కేసులు చాలానే వెలుగులోకి వస్తున్నాయి. ఈ పరిణామాలు తల్లిదండ్రులను మరియు వైద్యులను ఆందోళనకు గురిచేస్తున్నాయి.
ప్రమాదకరమైన రసాయనాలు: ప్రస్తుతం మార్కెట్లో దొరుకుతున్న సగానికి పైగా కాటుకలు స్వచ్ఛమైనవి కావు. వీటిలో రసాయనాలు, కార్బన్, సీసం (Lead) మరియు ఇతర విషపూరిత పదార్థాలు ఉంటున్నాయి. ఇవి పిల్లల సున్నితమైన కళ్లకు హానికరం. పెద్దవారితో పోలిస్తే పసిబిడ్డల కంటి చర్మం చాలా సెన్సిటివ్‌గా ఉంటుంది. కాబట్టి, అతి తక్కువ పరిమాణంలో రసాయనాలు కంటిలోకి వెళ్లినా అది తీవ్ర నష్టాన్ని కలిగిస్తుంది.
కలిగే ఇబ్బందులు: కాటుక వల్ల పిల్లల కళ్లలో నీరు కారడం, ఎర్రబడటం, దురద, వాపు వంటి సమస్యలు వస్తాయని వైద్యులు చెబుతున్నారు. చాలా సందర్భాల్లో ఇన్‌ఫెక్షన్ తీవ్రమవ్వడం వల్ల యాంటీబయాటిక్స్ వాడాల్సి వస్తుంది. కాటుకను సుదీర్ఘకాలం ఉపయోగించడం వల్ల కంటిలోని నల్లగుడ్డు (Cornea) దెబ్బతినే ప్రమాదం ఉంది. ఇది పిల్లల చూపుపై కూడా ప్రభావం చూపవచ్చు.
అందుకే, ఏడాది లోపు పిల్లలకు కళ్లకు ఎట్టి పరిస్థితుల్లోనూ కాటుక పెట్టవద్దని వైద్యులు హెచ్చరిస్తున్నారు. ఒకవేళ పెట్టడం తప్పనిసరి అని మీరు భావిస్తే, బయట షాపుల్లో కొనే కాటుకలను పూర్తిగా నివారించాలి.