చెన్నైలోని క్వాయిడ్-ఇ-మిల్లత్ ప్రభుత్వ మహిళా కళాశాలలో జరిగిన ఒక కార్యక్రమంలో డీఎంకే ఎంపీ దయానిధి మారన్ చేసిన వ్యాఖ్యలు రాజకీయ దుమారాన్ని రేపాయి. తమిళనాడులోని మహిళల స్థితిగతులను ఉత్తరాది మహిళలతో పోలుస్తూ ఆయన చేసిన వ్యాఖ్యలు తీవ్ర విమర్శలకు దారితీశాయి.
దయానిధి మారన్ ఏమన్నారు? విద్యార్థినులను ఉద్దేశించి ఆయన మాట్లాడుతూ.. “మన అమ్మాయిలు ల్యాప్‌టాప్ పట్టుకుని ఇంటర్వ్యూలకు వెళ్లేటప్పుడు చాలా ఆత్మవిశ్వాసంతో ఉండాలి. తమిళనాడులో మేము అమ్మాయిలను చదువుకోమని ప్రోత్సహిస్తాము. కానీ ఉత్తరాదిలో ఏమంటారు? అమ్మాయిలారా.. ఉద్యోగాలకు వెళ్లకండి, ఇంట్లోనే ఉండండి, వంటింటికే పరిమితం అవ్వండి, పిల్లలను కనండి, అదే మీ పని అని అంటారు.” అని వ్యాఖ్యానించారు.
తమిళనాడు పురోగతికి ద్రావిడ రాజకీయాలే కారణమని, అందుకే గ్లోబల్ కంపెనీలు చెన్నైకి వస్తున్నాయని ఆయన పేర్కొన్నారు. దేశంలోనే అత్యుత్తమ ముఖ్యమంత్రి ఎంకే స్టాలిన్ అని ఆయన కొనియాడారు.
బీజేపీ రియాక్షన్: మారన్ వ్యాఖ్యలపై బీజేపీ తీవ్రస్థాయిలో మండిపడింది. “దయానిధి మారన్ మరోసారి ఉత్తరాది ప్రజలను అవమానించారు. ఆయనకు కనీస విజ్ఞత లేదు” అని తమిళనాడు బీజేపీ ప్రతినిధి నారాయణన్ తిరుపతి విమర్శించారు. బీజేపీ నాయకురాలు అనిలా సింగ్ మాట్లాడుతూ.. “భారతదేశం శక్తిని ఆరాధిస్తుందని ఆయన మర్చిపోయారు. ద్రౌపదీ ముర్ము లాంటి వారు ఉత్తరాది నుండే వచ్చారని ఆయనకు తెలియదా? ఇలాంటి విభజన రాజకీయాలు పని చేయవు” అని అన్నారు.
డీఎంకే వివరణ: మారన్ వ్యాఖ్యలను డీఎంకే సమర్థించుకుంది. విద్యార్థినులను ఉత్తేజితం చేయడానికే ఆయన అలా అన్నారని సీనియర్ నాయకుడు టీకేఎస్ ఇలంగోవన్ తెలిపారు. దేశంలోని పారిశ్రామిక రంగంలో పనిచేసే మహిళల్లో 40% పైగా కేవలం తమిళనాడు నుండే ఉన్నారని, ఆ మహిళా సాధికారతను ఉద్దేశించే మారన్ అలా మాట్లాడారని పార్టీ వర్గాలు పేర్కొన్నాయి.