బులంద్షహర్: ఉత్తరప్రదేశ్లోని బులంద్షహర్ జిల్లా ఖుర్జాలో జరిగిన పుట్టినరోజు వేడుకలో కేక్ పూయడంపై మొదలైన గొడవ పెను విషాదానికి దారితీసింది. ఈ వివాదం ముదిరి కాల్పుల వరకు వెళ్లడంతో, తలల్లో బుల్లెట్లు దిగి ముగ్గురు వ్యక్తులు అక్కడికక్కడే ప్రాణాలు కోల్పోయారు. ఈ పుట్టినరోజు వేడుక ఒక జిమ్లో జరుగుతుండగా ఈ ఘటన చోటుచేసుకుంది.
మీరట్ రేంజ్ డిఐజి (DIG) కలానిధి నైతాని తెలిపిన వివరాల ప్రకారం.. జిమ్లో కొంతమంది యువకుల మధ్య ఏదో విషయంలో గొడవ జరిగింది. నిందితుల్లో ఒకరు తన పుట్టినరోజు జరుపుకుంటున్నట్లు సమాచారం. నిందితులను పట్టుకోవడానికి ప్రత్యేక బృందాలను ఏర్పాటు చేశామని, సీసీటీవీ ఫుటేజీని పరిశీలిస్తున్నామని ఆయన వెల్లడించారు. క్షేత్రస్థాయి బృందాలు ఆధారాలను సేకరించాయని, వారి మధ్య వచ్చిన విబేధాలే ఈ గొడవకు కారణమని ప్రాథమికంగా తేలిందని చెప్పారు.
క్షణికావేశంలో కాల్పులు: పుట్టినరోజు పార్టీలో జరిగిన ఈ హత్యలపై ఎస్పీ (రూరల్) అంతరిక్ష జైన్ మాట్లాడుతూ.. ముఖానికి కేక్ రాయడంపై స్నేహితుల మధ్య తలెత్తిన చిన్న వివాదం ఒక్కసారిగా పెద్దదైందని చెప్పారు. ఆవేశంలో జరిపిన కాల్పుల వల్ల ముగ్గురు మరణించారని, ఈ ఘటనతో ఆ ప్రాంతంలో కలకలం రేగిందని తెలిపారు. ప్రస్తుతం ఘటనా స్థలంలో భారీ పోలీసు బలగాలను మోహరించారు.
మృతుడి సోదరుడు తెలిపిన వివరాలు: మృతుల్లో ఒకరైన సంజయ్ సైనీ సోదరుడు మాట్లాడుతూ.. సుభాష్ హల్వాయి కొడుకు జీతూ సైనీ పుట్టినరోజు అని, అందరినీ అక్కడికి ఆహ్వానించాడని చెప్పారు. “వాళ్ల మధ్య ఏదో వాదన జరిగింది. నా సోదరుడు అమర్దీప్ను అక్కడే వదిలేసి వెళ్లిపోయారు. మీ తమ్ముడు గొడవ చేస్తున్నాడని నాకు ఫోన్ వచ్చింది. నేను ఒక పెళ్లికి వెళ్లాల్సి ఉండటంతో పొద్దున్న మాట్లాడతానని చెప్పాను. కానీ వారి వద్ద ఏడు లేదా ఎనిమిది లైసెన్స్డ్ ఆయుధాలు ఉన్నాయి, వాటిని తీసుకుని వెంటనే అక్కడికి చేరుకున్నారు.”
“ఈ క్రమంలోనే వారు నా సోదరుడు మరియు మేనల్లుళ్లు అయిన మనీష్ సైనీ, ఆకాష్ సైనీలను కూడా అక్కడికి రమ్మన్నారు. వారు అక్కడికి చేరుకోగానే నిందితులు వెంటనే కాల్పులు ప్రారంభించారు, ఎవరికీ తప్పించుకునే అవకాశం ఇవ్వలేదు. ఈ కాల్పుల్లో అమర్దీప్ సైనీ, మనీష్ సైనీ మరియు ఆకాష్ సైనీ ప్రాణాలు కోల్పోయారు” అని ఆయన ఆవేదన వ్యక్తం చేశారు.