పుదుచ్చేరిలోని రాజా వీధిలో ఉన్న ఒక లాడ్జ్ మేనేజర్ రామస్వామికి, “డాక్టర్ విఘ్నేష్” అని పరిచయం చేసుకున్న ఒక వ్యక్తి చేసిన మోసం ఇప్పుడు ఆ రాష్ట్రమంతటా సంచలనం సృష్టిస్తోంది.
“వివాహిత మహిళలను సహజ పద్ధతిలో గర్భవతిని చేస్తే ₹25 లక్షల జీతం మరియు ₹2 లక్షల అడ్వాన్స్ ఇస్తాం” అంటూ ఆశచూపి ఈ భారీ మోసానికి పాల్పడ్డారు.
అసలేం జరిగింది? కేటుగాళ్ల మాటలు నమ్మిన రామస్వామి, ‘రిజిస్ట్రేషన్ ఫీజు’ పేరుతో వారు పంపిన క్యూఆర్ (QR) కోడ్కు ₹49,500 పంపాడు. మిగిలిన ₹500 కోసం తన లాడ్జ్ యజమానిని అడగడంతో అసలు విషయం వెలుగులోకి వచ్చింది. యజమాని అనుమానంతో ఆ నంబర్కు ఫోన్ చేయగా అది స్విచ్ ఆఫ్ అని వచ్చింది.
సైకలాజికల్ ట్రాప్: ఈ ముఠా కేవలం డబ్బుతోనే కాకుండా, రామస్వామిని నమ్మించడానికి చాలా తెలివిగా “సైకలాజికల్” అబద్ధాలు చెప్పింది. ఆ వ్యక్తి ఫోన్లో మాట్లాడుతూ.. “ఫెర్టిలిటీ సెంటర్లకు వచ్చే చాలా మంది మహిళలకు వారి భర్తల వల్ల సంతాన భాగ్యం ఉండదు. కృత్రిమ పద్ధతుల కంటే సహజమైన సంబంధం ద్వారా గర్భం దాల్చడానికే ఆ దంపతులు ఇష్టపడతారు. సహజ పద్ధతిలో పుట్టే బిడ్డ ఆరోగ్యంగా ఉంటాడని భర్తలే స్వయంగా ఒప్పుకుని తమ భార్యలతో సంబంధానికి అనుమతిస్తారు. మీలాంటి దృఢమైన యువకులనే వారు కోరుకుంటారు. మీరు ఆ మహిళతో ఉన్నప్పుడు భర్తలు కూడా అదే గదిలో ఉంటారు” అంటూ ఇది చట్టవిరుద్ధం కాదనే భ్రమను కల్పించారు.
“ఇది చాలా రహస్యంగా ఉంటుంది, ఎవరికీ అనుమానం రాదు” అని చెప్పి రామస్వామి సంకోచాన్ని పోగొట్టి బుట్టలో వేసుకున్నారు.
పోలీసుల హెచ్చరిక: బాధితుడు రామస్వామి ఇచ్చిన ఫిర్యాదుతో పోలీసులు విచారణ చేపట్టారు. “రహస్య ఉద్యోగాలు, డోనర్ ఉద్యోగాలు అని చెప్పి ముందస్తు డబ్బు అడిగే 99% కాల్స్ మోసపూరితమైనవే. ప్రజలు అత్యాశకు పోయి డబ్బులు పోగొట్టుకోవద్దు” అని పోలీసులు తీవ్రంగా హెచ్చరించారు. డబ్బు ఆశతో మోసపోయిన ఆ మేనేజర్ ఇప్పుడు పోలీస్ స్టేషన్లో కన్నీరుమున్నీరవుతున్నాడు.