పురుషుల మెనూ కార్డులోనే ధరలు.. మహిళలకు ఉండవు! “రెండు డ్రింక్స్, ఒక స్వీట్.. మొత్తం బిల్లు రూ.88,982”.. తిన్న తర్వాత బిల్లు చూసి షాకైన ప్రముఖ ఇన్‌ఫ్లుయెన్సర్..!!!

విలాసవంతమైన రెస్టారెంట్లకు వెళ్లి భోజనం చేయడం ఒక ప్రత్యేకమైన అనుభూతి. కానీ, తిన్న తర్వాత వచ్చే బిల్లు చూసి కళ్లు తిరిగి పడిపోయేంత పనైతే ఎలా ఉంటుంది? అందులోనూ మీరు ఆర్డర్ చేసేటప్పుడు మెనూ కార్డులో అసలు ధరలే లేకపోతే? సరిగ్గా ఇలాంటి ఓ వింతైన, షాకింగ్ అనుభవాన్ని ఎదుర్కొన్నారు ప్రముఖ ఫైనాన్స్ కంటెంట్ క్రియేటర్ లియానా డానియెల్లా (Liana Daniella).

ఇటలీలోని ఓ ప్రముఖ స్టార్ హోటల్‌లో భర్తతో కలిసి డిన్నర్ చేస్తున్నప్పుడు, ఇద్దరికీ ఒకే రకమైన మెనూ కార్డులు ఇచ్చినప్పటికీ అందులో ఓ పెద్ద తేడా ఉండటాన్ని ఆమె గమనించారు. ఇటలీలోని ‘లేక్ కోమో’ (Lake Como) ప్రాంతంలో ఉన్న ప్రఖ్యాత ‘గ్రాండ్ హోటల్ ట్రెమెజో’ (Grand Hotel Tremezzo) రెస్టారెంట్‌కు లియానా తన భర్తతో కలిసి వెళ్లారు. అక్కడ ఇద్దరికీ మెనూ కార్డులు అందించారు. ఆహార పదార్థాలను సెలెక్ట్ చేసుకుంటున్న సమయంలో ఆమె భర్త ఒక డిష్ ధర గురించి ప్రస్తావించారు.

అప్పుడే లియానాకు అసలు విషయం అర్థమైంది. కేవలం ఆమె భర్తకు ఇచ్చిన మెనూ కార్డులో మాత్రమే ఆహార పదార్థాల ధరలు ముద్రించి ఉన్నాయి. లియానాకు ఇచ్చిన మెనూ కార్డులో కేవలం వంటకాల పేర్లు మాత్రమే ఉన్నాయి తప్ప, ఎక్కడా ధరలు లేవు! గతంలో రోమ్‌లోని ఓ 3-మిషెలిన్ స్టార్ రెస్టారెంట్‌లో కూడా ఆమెకు ఇలాంటి అనుభవమే ఎదురైంది.

ధరలు లేకపోయినా పర్వాలేదులే అని ఫుడ్ ఆర్డర్ చేసి తిన్న తర్వాత, బిల్లు చూసి లియానా గుండె గుభేల్‌మంది. డిన్నర్‌లో భాగంగా ఆమె ఆర్డర్ చేసిన కేవలం రెండు డ్రింక్స్ ధరే $120 (సుమారు రూ.11,520). పుట్టినరోజు వేడుక కోసం ఆర్డర్ చేసిన ఓ స్వీట్ (డెజర్ట్) ధర $140 (సుమారు రూ.13,440). ఇలా వారు తిన్న మొత్తం భోజనానికి సర్వీస్ ఛార్జీలతో కలిపి ఏకంగా $926.86 (సుమారు రూ.88,982) బిల్లు వచ్చింది!

దీనిపై లియానా స్పందిస్తూ.. “అక్కడ ఫుడ్ అద్భుతం అని చెప్పేంత గొప్పగా ఏమీ లేదు. ఈ డిన్నర్‌కు గరిష్టంగా $500 ఖర్చవుతుందని నేను అంచనా వేశాను. నా మెనూ కార్డులో ధరలు ఉండి ఉంటే కాస్త ఆలోచించి ఆర్డర్ చేసేదాన్ని” అని ఆవేదన వ్యక్తం చేశారు. లియానా తన ఇన్‌స్టాగ్రామ్ పేజీలో షేర్ చేసిన ఈ వీడియో 4.1 మిలియన్లకు (41 లక్షలకు) పైగా వ్యూస్‌తో వైరల్ అవుతోంది.

దీనిపై నెటిజన్లు భిన్న రకాలుగా స్పందిస్తున్నారు. “బిల్లు ఎవరు కట్టినా సరే, కస్టమర్ల విషయంలో పారదర్శకత ఉండాలి. ఆడా, మగా అనే తేడాతో మెనూ కార్డులు మార్చి ఇవ్వడం తప్పు” అని కొందరు విమర్శిస్తున్నారు.

మరికొందరు మాత్రం.. “ఇది కేవలం ఇటలీ సంస్కృతి మాత్రమే కాదు; చాలా లగ్జరీ రెస్టారెంట్లలో ఏళ్ల తరబడి పాటిస్తున్న ‘నో-ప్రైస్ మెనూ’ (బ్లైండ్ మెనూ) అనే సాంప్రదాయం. అతిథులు ధరల గురించి ఆలోచించకుండా భోజనాన్ని ఆస్వాదించాలనే ఉద్దేశంతో, కేవలం ఆహ్వానించిన వారికి (హోస్ట్‌కు) మాత్రమే ధరలు ఉన్న మెనూ కార్డు ఇస్తారు” అని వివరిస్తున్నారు.