పెళ్లయ్యాక ఒకరిపై ఒకరికి ఆసక్తి తగ్గుతోందా? సాన్నిహిత్యం పెంచుకోవడానికి నిపుణుల ప్రత్యేక సలహాలు ఇవే!

జీవనశైలి: ప్రస్తుత కాలంలో చాలా మంది జంటలు ఎదుర్కొంటున్న ప్రధాన సమస్య సాన్నిహిత్యం తగ్గడం. దీనికి కారణం కేవలం శారీరక బలహీనత మాత్రమే కాదు, దంపతుల మధ్య పెరుగుతున్న మానసిక దూరమే ప్రధాన కారణమని నిపుణులు చెబుతున్నారు.

నేటి ఉరుకుల పరుగుల జీవితంలో భార్యాభర్తలు ఒకే ఇంట్లో ఉంటున్నా.. కలిసి గడిపే నాణ్యమైన సమయం (Quality Time) తగ్గిపోతోంది. పని ఒత్తిడి, రోజంతా అలసట, ఫోన్లకు ఎక్కువ సమయం కేటాయించడం వల్ల కమ్యూనికేషన్ లోపిస్తోంది. ఈ క్రమంలో, ప్రముఖ నిపుణురాలు సీమా ఆనంద్ ఒక పాడ్‌కాస్ట్‌లో దంపతుల మధ్య బంధాన్ని మళ్ళీ చిగురింపజేయడానికి కొన్ని ఆచరణాత్మక చిట్కాలను పంచుకున్నారు.

సాన్నిహిత్యం అంటే కేవలం శారీరక సంబంధమే కాదు
చాలా మంది పొరపడే విషయం ఏమిటంటే.. సాన్నిహిత్యం (Intimacy) అంటే కేవలం శారీరక కలయిక అని మాత్రమే అనుకుంటారు. కానీ నిజమైన సాన్నిహిత్యం మానసిక అనుబంధం నుండే మొదలవుతుంది.

భద్రత: మీ భాగస్వామితో మీరు మీ మనసులోని చిన్న చిన్న విషయాలను పంచుకున్నప్పుడు, వారి వద్ద మీరు సురక్షితంగా ఉన్నారని భావించినప్పుడే నిజమైన సాన్నిహిత్యం ఏర్పడుతుంది.

భావాల వ్యక్తీకరణ: ఎటువంటి సంకోచం లేకుండా మీ ఫీలింగ్స్ చెప్పగలగడం, ఎదుటివారు మిమ్మల్ని అర్థం చేసుకుంటారనే నమ్మకం ఉండటమే అసలైన అనుబంధం.

ప్రెజెన్స్ (Presence) చాలా ముఖ్యం
నేటి రోజుల్లో సాన్నిహిత్యాన్ని కూడా ఒక ‘పెర్ఫార్మెన్స్‌’లా చూస్తున్నారు. కానీ నిజానికి భాగస్వామికి కావాల్సింది మీ సమయం మరియు ఉనికి మాత్రమే. శారీరక చర్య కంటే ముందు వారి పక్కన కూర్చుని, మీరు వారి కోసం ఉన్నారనే భావన కల్పించడం బంధాన్ని బలోపేతం చేస్తుంది.

సీమా ఆనంద్ ఇచ్చిన ’15 నిమిషాల’ అద్భుత సలహా
భార్యాభర్తలు ప్రతిరోజూ కనీసం 15 నిమిషాల పాటు కలిసి పడుకుని కేవలం మాట్లాడుకోవాలని సీమా ఆనంద్ సూచిస్తున్నారు.

ఈ సమయంలో ఎటువంటి ఇతర ఆలోచనలు లేదా ఒత్తిడి ఉండకూడదు.

మీ రోజంతా ఎలా గడిచిందో చెప్పండి, వారి మాటలు వినండి.

ఈ 15 నిమిషాల ఉద్దేశ్యం కేవలం ఒకరితో ఒకరు ఉండటమే తప్ప, మరొకటి ఆశించడం కాదు.

స్పర్శతో పెరిగే అనుబంధం (Skin to Skin Connection)
భాగస్వామితో కలిసి సమయం గడిపేటప్పుడు ఒకరినొకరు తాకడం (Skin to Skin touch) వల్ల కంఫర్ట్ మరియు నమ్మకం పెరుగుతాయి. ఇది మీ బంధం ఎంత బలమైనదో గుర్తు చేస్తుంది. క్రమం తప్పకుండా ఇలా చేయడం వల్ల మీ మధ్య ఉన్న దూరం దానంతట అదే తగ్గిపోతుంది.

కోరికను బలవంతం చేయలేం
లైంగిక కోరిక అనేది బలవంతంగా వచ్చేది కాదు. బంధం ఆరోగ్యకరంగా, సౌకర్యవంతంగా ఉన్నప్పుడు అది సహజంగానే కలుగుతుంది. కాబట్టి, కేవలం సెక్స్‌పై మాత్రమే దృష్టి పెట్టకుండా.. మానసిక అనుబంధాన్ని పెంచుకోవడంపై పని చేయండి. అనుబంధం బలపడితే, సాన్నిహిత్యం మరియు కోరికలు దానంతట అవే మెరుగుపడతాయి.