చెన్నైలో నేడు ఆంధ్రప్రదేశ్ మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి కుటుంబానికి చెందిన వివాహ వేడుక ఘనంగా జరిగింది. ఉదయం హిందూ సంప్రదాయం ప్రకారం జరిగిన వివాహానికి తమిళనాడు ముఖ్యమంత్రి ఎం.కె. స్టాలిన్ తన భార్యతో కలిసి హాజరుకాగా, సాయంత్రం క్రైస్తవ పద్ధతిలో జరిగిన రిసెప్షన్‌కు నటుడు మరియు టీవీకే (TVK) అధినేత విజయ్ హాజరయ్యారు.
వధూవరులు ఎవరు? వరుడు సాహిల్, జగన్ మోహన్ రెడ్డి సోదరుడు సునీల్ రెడ్డి కుమారుడు. వధువు వేదిక, కారైకుడికి చెందిన ప్రముఖ వ్యాపార సంస్థ మురుగప్ప గ్రూపునకు చెందిన అరుణ్ మురుగప్పన్ – సిగప్పి దంపతుల కుమార్తె. ఇది ప్రేమ వివాహం కావడంతో ఇరు కుటుంబాల ఆచారాల ప్రకారం వివాహం జరిపించాలని నిర్ణయించుకున్నారు.
ముఖ్య అతిథులు: ఉదయం వధువు పక్షం కోరిక మేరకు హిందూ చెట్టినాడు పద్ధతిలో వివాహం జరిగింది. దీనికి సీఎం స్టాలిన్ తన భార్య దుర్గతో కలిసి హాజరై వధూవరులను ఆశీర్వదించారు. సాయంత్రం చెన్నై అన్నాసాలైలోని ఒక ప్రముఖ స్టార్ హోటల్‌లో రిసెప్షన్ జరిగింది. ఇందులో నటుడు విజయ్ పాల్గొని సందడి చేశారు.
ముందుగా స్టాలిన్ కూడా రిసెప్షన్‌కే రావాలని ప్లాన్ చేశారని, అయితే విజయ్ వస్తున్నారని తెలిసి తన షెడ్యూల్‌ను మార్చుకుని ఉదయమే పెళ్లికి వచ్చారని కొందరు గుసగుసలాడుకుంటున్నారు. ఈ వేడుకలో మాజీ కేంద్ర మంత్రి పి. చిదంబరం, నటులు సూర్య, కార్తీ సహా పలువురు ప్రముఖులు పాల్గొన్నారు.