టర్కీలో అట్టహాసంగా జరిగిన ఓ వివాహ వేడుక వీడియో సోషల్ మీడియాలో విపరీతంగా వైరల్ అయిన తర్వాత, ఆ పెళ్లి ఊహించని మలుపు తిరిగింది.
వధువు చాగ్లా ఓజ్ (Cagla Oz) ధరించిన బంగారు ఆభరణాలు, ఆ వివాహ వేదికపై ప్రదర్శించిన విలాసవంతమైన వస్తువుల మొత్తం విలువ సుమారు 44 మిలియన్ టర్కిష్ లీరాలు.. అంటే భారత కరెన్సీలో దాదాపు ₹8.64 కోట్లు అని నివేదికలు వెల్లడిస్తున్నాయి.
వైరల్ వీడియోలలో వధువు కిరీటం, భారీ హారాలు, గాజులతో సహా ఒంటినిండా లెక్కలేనన్ని బంగారు ఆభరణాలతో దర్శనమిచ్చింది. ఈ పెళ్లి తాలూకు విలాసాలు నెట్టింట క్షణాల్లో వైరల్ కావడంతో, వరుడు మెహమెట్ ఫాతిహ్ తాన్‌జలన్‌పై అప్పటికే కొనసాగుతున్న విచారణలో భాగంగా.. అతడి సంపద, ఆస్తులు, పెళ్లిలో ప్రదర్శించిన ఆభరణాల మూలాల (Source of wealth) పై అధికారులు దృష్టి సారించినట్లు సమాచారం.
దీంతో సెప్టెంబర్ 8వ తేదీ తెల్లవారుజామున వాన్ (Van) ప్రావిన్స్‌లోని మురాదియే ప్రాంతంలో ఉన్న అతడి నివాసానికి వెళ్లిన పోలీసులు అతడిని అరెస్ట్ చేశారు. పెళ్లిలో ప్రదర్శించిన కొన్ని ఆభరణాలు తమ సొంతం కావని, అద్దెకు తెచ్చుకున్నామని వరుడి తరఫు వారు పేర్కొన్నట్లు వార్తలు వస్తున్నాయి. అలాగే సోషల్ మీడియా ఇన్‌ఫ్లుయెన్సర్‌గా ఉన్న చాగ్లా ఓజ్ వివాహానికి కొన్ని వాణిజ్య సంస్థలు స్పాన్సర్‌షిప్ అందించాయని కూడా చెప్పారు. అయితే ఈ వాదనలను నిరూపించేందుకు సరైన పత్రాలు లేదా ఆధారాలు ప్రాథమిక విచారణలో లభించలేదని అధికారులు తెలిపారు.
వరుడిని అరెస్ట్ చేసిన నేపథ్యంలో, అతడి భార్యను కూడా పోలీసులు విచారణ నిమిత్తం అదుపులోకి తీసుకున్నారు. పెళ్లిలో ప్రదర్శించిన కోట్ల రూపాయల విలువైన బంగారు నగలు, ఇతర ఆస్తుల నిజమైన మూలం ఏమిటనే దానిపై దర్యాప్తు కొనసాగుతోంది. కేవలం కస్టడీలోకి తీసుకున్నంత మాత్రాన నేరం రుజువైనట్లు కాదని, చట్టపరమైన విచారణ పూర్తయిన తర్వాతే తుది తీర్పు వెలువడుతుందని అధికారులు స్పష్టం చేశారు.