గురుదాస్పూర్: వరకట్నం అనే దురాచారం సమాజానికి శాపంలా మారింది. చట్టం దీనిని నేరమని చెబుతున్నా, కొంతమంది మానవత్వం లేకుండా ప్రవర్తిస్తున్నారు. వరకట్న వేధింపుల కారణంగా ఒక గర్భవతి ప్రాణాలు కోల్పోయిన అత్యంత విషాదకర ఘటన గురుదాస్పూర్లో వెలుగుచూసింది.
అసలేం జరిగింది? సుమారు 8 నెలల క్రితం మంజీత్ కౌర్కు సిమ్రన్ అనే వ్యక్తితో వివాహం జరిగింది. పెళ్లి సమయంలో అమ్మాయి తరపు వారు తమ శక్తి మేరకు కట్నకానుకలు ఇచ్చారు. అయితే, పెళ్లయిన కొద్ది రోజుల నుండే అత్తమామలు కట్నం కోసం మంజీత్ను వేధించడం మొదలుపెట్టారు. పెళ్లి చేసుకున్నది సైన్యంలో పనిచేస్తున్న వ్యక్తి అయినప్పటికీ, అతను కూడా కట్నం కోసం భార్యను, ఆమె తండ్రిని వేధించడం ప్రారంభించాడు.
ఫోన్ కాల్తో మొదలైన విషాదం: మంజీత్ భర్త సిమ్రన్ రెండు రోజుల క్రితం సెలవుపై ఇంటికి వచ్చాడు. భార్యతో గొడవపడి తిరిగి డ్యూటీకి వెళ్లిపోయాడు. ఆ మరుసటి రోజే మంజీత్ తన తండ్రికి ఫోన్ చేసి, “నాన్న.. అత్తమామలు నన్ను విపరీతంగా కొడుతున్నారు, వెంటనే వచ్చి కాపాడండి, లేకపోతే వారు నన్ను చంపేస్తారు” అని ఏడుస్తూ వేడుకుంది. వెంటనే ఆమె తండ్రి హర్ప్రీత్ సింగ్ పరుగున అత్తగారింటికి చేరుకున్నారు.
లాల్చీలో శవమై.. అక్కడికి వెళ్లి చూసేసరికి, మంజీత్ కౌర్ మృతదేహం ఇంటి లాబీలో పడి ఉంది. తన కూతురు శవమై కనిపించడంతో తండ్రి హర్ప్రీత్ సింగ్ కన్నీరుమున్నీరయ్యారు. వెంటనే పోలీసులకు ఫిర్యాదు చేయగా, వారు మృతదేహాన్ని స్వాధీనం చేసుకుని పోస్ట్మార్టం కోసం తరలించారు. కేసు నమోదు కాగానే నిందితులైన అత్తమామలు, కుటుంబ సభ్యులు ఇంటిని వదిలి పరారయ్యారు.
కడుపులో బిడ్డతో ఉన్న మంజీత్ కౌర్, కట్నపిశాచుల చేతిలో ప్రాణాలు కోల్పోవడం స్థానికంగా తీవ్ర ఆగ్రహానికి, ఆందోళనకు దారితీసింది. పరారీలో ఉన్న నిందితుల కోసం పోలీసులు గాలింపు చేపట్టారు.