బెంగళూరులోని నెలమంగళ ప్రాంతంలో ఒక అదృశ్యం కేసు దర్యాప్తు ఊహించని మలుపు తిరిగింది. పోలీస్ స్టేషన్లో విచారణ ఎదుర్కొంటున్న ఒక యువకుడు భయంతో లాకప్ తాళం మింగేయడంతో పోలీసులు, వైద్య సిబ్బంది విస్తుపోయారు.
‘ది టైమ్స్ ఆఫ్ ఇండియా’ కథనం ప్రకారం, ఈ ఘటన ఆదివారం మాదానాయకనహళ్లి పోలీస్ స్టేషన్లో చోటుచేసుకుంది. 17 ఏళ్ల బాలిక అదృశ్యం కేసులో విచారణ జరుపుతున్న పోలీసులు, మొబైల్ టవర్ లొకేషన్ ఆధారంగా రాము అనే యువకుడిని గుర్తించి స్టేషన్కు తీసుకువచ్చారు.
పోలీసుల సమాచారం ప్రకారం, కఠినమైన ‘పోక్సో చట్టం’ (POCSO Act) కింద తనపై కేసు నమోదవుతుందేమోనని రాము తీవ్ర భయాందోళనకు గురయ్యాడు. విచారణ జరుగుతుండగానే, తనను తాను గాయపరుచుకోవాలనే ఉద్దేశంతో లాకప్ తాళాన్ని మింగేశాడు. దీంతో అప్రమత్తమైన పోలీసులు వెంటనే అతడిని అత్యవసర చికిత్స కోసం సమీపంలోని ప్రైవేట్ ఆసుపత్రికి తరలించారు.
జీర్ణవ్యవస్థలో చిక్కుకున్న ఆ లోహపు తాళాన్ని తొలగించడానికి శస్త్రచికిత్స అవసరమా అని వైద్యులు తొలుత పరిశీలించారు. అయితే, ఆపరేషన్ లేకుండానే సహజ పద్ధతిలో దానిని బయటకు తీసుకురావాలని నిర్ణయించారు. ఇందులో భాగంగా, గత మూడు రోజులుగా రాముకు సుమారు 10 కిలోల అరటిపండ్లను తినిపించారు. వైద్యులు, పోలీసులు నిరంతరం పర్యవేక్షిస్తూ ఎటువంటి అంతర్గత ఆరోగ్య సమస్యలు తలెత్తకుండా జాగ్రత్తలు తీసుకున్నారు.
వైద్యుల వ్యూహం ఫలించి, మూడు రోజుల చికిత్స తర్వాత తాళం సహజంగానే బయటకు వచ్చింది. దీంతో పోలీసులు ఊపిరి పీల్చుకున్నారు.
మంగళవారం ఆసుపత్రి నుండి డిశ్చార్జ్ అయిన రామును పోలీసులు మళ్ళీ స్టేషన్కు తీసుకువచ్చారు. ఆత్మహత్యాయత్నం చేసినందుకు గాను అతనిపై విడిగా మరో కేసు నమోదు చేసినట్లు పోలీసులు తెలిపారు. కాగా, అదృశ్యమైన 17 ఏళ్ల బాలిక కోసం గాలింపు చర్యలు కొనసాగుతున్నాయి.