నిజాయితీగా పన్ను చెల్లించే వారికి కూడా ఆదాయపు పన్ను శాఖ నుండి నోటీసు వస్తే కంగారు పడటం సహజం. అయితే, ఈ నోటీసులు ఎప్పుడూ భయపడాల్సినవి కావు. మనం చేసిన చిన్న చిన్న పొరపాట్లను సరిదిద్దుకోవడానికి లేదా వివరణ ఇవ్వడానికి ఇవి పంపబడతాయి. బ్యాంక్ డిపాజిట్లు, మ్యూచువల్ ఫండ్స్, ఆస్తి కొనుగోలు వంటి లావాదేవీలను ఐటీ శాఖ నిరంతరం గమనిస్తూ ఉంటుంది.
మీరు ఐటీ రిటర్న్స్ (ITR) దాఖలు చేయకపోయినా లేదా మీ ఆదాయం కంటే ఎక్కువ ఖర్చు చేసినా నోటీసు వచ్చే అవకాశం ఉంది. ముఖ్యంగా ఈ క్రింది 6 రకాల లావాదేవీలు చేస్తే ఆదాయపు పన్ను శాఖ నుండి మీకు నోటీసు రావడం ఖాయం:
- సేవింగ్స్ ఖాతా లావాదేవీలు: మీ సేవింగ్స్ బ్యాంక్ ఖాతాలో ఒక సంవత్సరంలో రూ. 10 లక్షల కంటే ఎక్కువ నగదు డిపాజిట్ చేసినా లేదా విత్ డ్రా చేసినా ఐటీ శాఖ వివరణ కోరుతుంది.
- కరెంట్ ఖాతా లావాదేవీలు: వ్యాపారస్తులు తమ కరెంట్ ఖాతాలో సంవత్సరానికి రూ. 50 లక్షల కంటే ఎక్కువ నగదు లావాదేవీలు జరిపితే నోటీసు వచ్చే అవకాశం ఉంది.
- క్రెడిట్ కార్డ్ బిల్లులు: క్రెడిట్ కార్డ్ బిల్లును రూ. 1 లక్ష కంటే ఎక్కువ నగదు (Cash) రూపంలో చెల్లించినా, లేదా ఒక సంవత్సరంలో మొత్తం రూ. 10 లక్షల కంటే ఎక్కువ క్రెడిట్ కార్డ్ బిల్లులు చెల్లించినా ఐటీ శాఖ నిఘా ఉంటుంది.
- ఫిక్స్‌డ్ డిపాజిట్ (FD): ఒక ఆర్థిక సంవత్సరంలో రూ. 10 లక్షల కంటే ఎక్కువ మొత్తాన్ని ఫిక్స్‌డ్ డిపాజిట్ చేస్తే, ఆ డబ్బు ఎక్కడి నుండి వచ్చిందో తెలపాల్సిందిగా నోటీసు రావచ్చు.
- మ్యూచువల్ ఫండ్స్/షేర్లు: మ్యూచువల్ ఫండ్స్ లేదా స్టాక్ మార్కెట్‌లో ఒక సంవత్సరంలో రూ. 10 లక్షల కంటే ఎక్కువ పెట్టుబడి పెడితే ఐటీ శాఖ నోటీసు పంపే అవకాశం ఉంది.
- ఆస్తి కొనుగోలు: ఒక ఏడాదిలో రూ. 30 లక్షల కంటే ఎక్కువ విలువైన ఆస్తిని కొనుగోలు చేసినా లేదా విక్రయించినా ఆ వివరాలను ఐటీ శాఖకు తెలపాలి. ముఖ్యంగా పట్టణ ప్రాంతాల్లో రూ. 50 లక్షలు, గ్రామీణ ప్రాంతాల్లో రూ. 20 లక్షలు దాటిన ఆస్తి లావాదేవీలపై ఐటీ శాఖ ప్రత్యేక దృష్టి పెడుతుంది.