ఇరాన్ ప్రభుత్వానికి వ్యతిరేకంగా ఆ దేశ ప్రజలు తీవ్ర స్థాయిలో పోరాటం చేస్తున్నారు. ఆర్థిక సంక్షోభం, ద్రవ్యోల్బణం మరియు నిత్యావసర వస్తువుల ధరల పెరుగుదల వల్ల విసిగిపోయిన ప్రజలు.. దేశ అత్యున్నత నాయకుడు అయతుల్లా అలీ ఖమేనీకి వ్యతిరేకంగా నిరసనలు తెలుపుతున్నారు. ఈ నిరసనలను అణచివేసేందుకు ఇరాన్ ప్రభుత్వం కఠిన చర్యలు తీసుకుంటోంది.
ఘటన వివరాలు: ప్రభుత్వానికి వ్యతిరేకంగా పోరాడిన 26 ఏళ్ల ఎర్ఫాన్ సుల్తానీ అనే యువకుడిని జనవరి 8న భద్రతా దళాలు అరెస్ట్ చేశాయి. కేవలం వారం రోజుల్లోనే అతనికి మరణశిక్ష విధిస్తూ ప్రభుత్వం ఉత్తర్వులు జారీ చేసింది. అతడిని ఈరోజు బహిరంగంగా, ప్రజల ముందే ఉరి తీయాలని ఇరాన్ ప్రభుత్వం ఆదేశించింది.
కుటుంబానికి నిరాశ: ఉరితీయడానికి ముందు ఎర్ఫాన్ సుల్తానీని చూసేందుకు అతని కుటుంబానికి కేవలం 10 నిమిషాలు మాత్రమే సమయం ఇచ్చారు. అతను ఏ చట్టం కింద శిక్షించబడ్డాడో, అతనిపై ఉన్న ఆరోపణలు ఏమిటో కూడా కుటుంబానికి స్పష్టంగా తెలియజేయలేదు. ప్రభుత్వానికి వ్యతిరేకంగా పోరాడటం అంటే “దేవుడికి వ్యతిరేకంగా శత్రుత్వాన్ని పెంచడమే” (Enmity against God) అని ఇరాన్ ప్రభుత్వం ప్రకటించింది. ఈ ఘటనపై ప్రపంచవ్యాప్తంగా మానవ హక్కుల సంఘాలు తీవ్ర ఆగ్రహం వ్యక్తం చేస్తున్నాయి.