మాస్కో: ఇరాన్, ఉక్రెయిన్ యుద్ధ మేఘాల మధ్య రష్యా ఆర్థిక వ్యవస్థ తీవ్ర సవాళ్లను ఎదుర్కొంటోంది. ముఖ్యంగా పన్ను ఎగవేత మరియు ‘షాడో ఎకానమీ’ (నీడ ఆర్థిక వ్యవస్థ) పెరుగుదలను అడ్డుకోవడానికి అధ్యక్షుడు వ్లాదిమిర్ పుతిన్ ఇప్పుడు ఒక బలమైన వ్యూహాన్ని అమలు చేశారు.
రష్యా నుండి నగదు మరియు బంగారు కడ్డీలను విదేశాలకు తరలించడంపై కఠినమైన ఆంక్షలు విధిస్తూ పుతిన్ కొత్త ఉత్తర్వులపై సంతకం చేశారు. అంటే రష్యా తన బంగారు ఎగుమతులను దాదాపుగా నిలిపివేసింది. ఏప్రిల్ 1 మరియు మే 1 నుండి అమలులోకి రానున్న ఈ ఆదేశాలు రష్యా ఆర్థిక వ్యవస్థలో పెను మార్పులకు కారణం కానున్నాయి.
నగదు చలామణిపై నిషేధం!
రష్యా అధికారిక గణాంకాల ప్రకారం, జనవరి 2026లో మాత్రమే సుమారు 13.2 బిలియన్ డాలర్ల నగదు బ్యాంకింగ్ వ్యవస్థ నుండి బయటకు వెళ్లిపోయింది. వ్యాపార సంస్థలు విలువ ఆధారిత పన్ను (VAT) మరియు ఇతర పన్నులను తప్పించుకోవడానికి డిజిటల్ లావాదేవీలను పక్కన పెట్టి నగదు రూపంలో వ్యాపారాలు చేయడమే దీనికి ప్రధాన కారణం.
దీనిని అడ్డుకోవడానికి ఏప్రిల్ 1 నుండి:
- యూరేసియన్ ఎకనామిక్ యూనియన్ (EAEU) దేశాలకు 1,00,000 డాలర్ల కంటే ఎక్కువ విలువైన రూబుల్ నోట్లను తీసుకెళ్లడంపై నిషేధం విధించారు.
- నిర్దిష్ట అంతర్జాతీయ విమానాశ్రయాల ద్వారా వెళ్లే వారికి మాత్రమే ఇందులో మినహాయింపు ఉంటుంది.
- ఆ డబ్బు బ్యాంకు ఖాతా నుండి తీసిందే అని నిరూపించడానికి సరైన పత్రాలను సమర్పించడం తప్పనిసరి.
బంగారంపై ఉక్కుపాదం
నగదుకు బదులుగా బంగారం ఇప్పుడు అక్రమ లావాదేవీలకు ‘ప్రత్యామ్నాయ కరెన్సీ’గా మారింది. మనీ లాండరింగ్ చేసేవారు బంగారాన్ని ఆయుధంగా వాడుకోకుండా పుతిన్ ప్రభుత్వం తదుపరి చర్య తీసుకుంది.
మే 1 నుండి:
- వ్యక్తులు లేదా ప్రైవేట్ సంస్థలు 100 గ్రాముల కంటే ఎక్కువ బరువున్న బంగారు కడ్డీలను (Gold Bars) విదేశాలకు తీసుకెళ్లడం సాధ్యం కాదు.
- అయితే, వాణిజ్య బ్యాంకులకు (Commercial Banks) ఈ ఆంక్షల నుండి మినహాయింపు ఉంది.
- వ్నుకోవో (Vnukovo), షెరెమెట్యెవో (Sheremetyevo) వంటి నిర్దిష్ట విమానాశ్రయాల ద్వారా ‘ఫెడరల్ అసై చాంబర్’ అనుమతితో తీసుకెళ్లే బంగారానికి మాత్రమే అనుమతి ఉంటుంది.
బంగారం ధరలు భారీగా పెరిగే ఛాన్స్
ప్రపంచంలోనే అతిపెద్ద బంగారం ఉత్పత్తి దేశాల్లో రష్యా ఒకటి. అటువంటి దేశం తన బంగారం బయటకు వెళ్లకుండా నిషేధం విధిస్తే, అంతర్జాతీయ మార్కెట్‌లో సరఫరా కొరత (Supply Crunch) ఏర్పడుతుంది. ప్రపంచ వాణిజ్య కేంద్రాలకు అందాల్సిన బంగారం తగ్గినప్పుడు, సహజంగానే డిమాండ్ పెరిగి ధరలు ఆకాశాన్నంటుతాయి.
నల్లధనాన్ని అదుపు చేయడానికి రష్యా ప్రజలు కూడా దేశీయంగా బంగారాన్ని ఎక్కువగా నిల్వ చేయడం ప్రారంభిస్తే, అంతర్జాతీయ మార్కెట్‌లో చలామణి అయ్యే బంగారం మరింత తగ్గుతుంది. ఇది ప్రపంచవ్యాప్తంగా ఇన్వెస్టర్లలో ఆందోళన కలిగించి, గోల్డ్ స్పాట్ ప్రైస్ (Spot Price) పెరగడానికి దారితీస్తుంది.
ఎందుకు ఈ నిర్ణయం?
రష్యా ఆర్థిక శాఖ సహాయ మంత్రి అలెక్సీ మోయిసీవ్ మాట్లాడుతూ, “విదేశీ కరెన్సీకి బదులుగా బంగారం ఇప్పుడు అక్రమ నగదు బదిలీలకు ఉపయోగించబడుతోంది. దీనివల్ల దేశ సంపద బయటకు వెళ్లడమే కాకుండా నల్లధనం పెరుగుతోంది,” అని తెలిపారు. పన్నుల పెరుగుదల కారణంగా పరిశ్రమలు ‘షాడో ఎకానమీ’ వైపు మొగ్గు చూపుతుండటంతో పుతిన్ ఈ కఠిన నిర్ణయం తీసుకున్నట్లు తెలుస్తోంది.